Vawiin khan Lungdai YMA Hall-ah Lungdai khaw mipuite chuan Village Council huaihawtin an khawchhung a mi kum 14  leh kum 24 inkar thlalai zinga ruitheih thil chi hrang hrang leh zuk leh hmuam laka fihlim mi 75 chawimawina leh Kolasib District chhunga khaw faiber nih lawmman dawn lawmna hun an hmang a. He hun hi Chief Minister Pu Lal Thanhawla chuan a hmanpui a; Pi Lal Riliani, President, Indian Society on Tobacco & Health, Mizoram  chu khuallian ah hman a ni thung a ni.

LUNGDAI KHUA IN RUIHTHEIH THIL A FIHLIM TE CHAWIMAWINA
Lungdai khawtlang in chawimawina leh lawmna programme a huaihawtah hian Chief Minister Pu Lal Thanhawla chuan khawfai ber nih chu thil ropui tak a ni thu sawiin Lungdai khua in fai lawmman a dawn inchhuan nachang an hria leh thalai zuk leh hmuam lak a fihlim te chawimawina  buatsaih nachang an hria chu midangte tan entawn tlak a ni a ti a. Mi dang te tanpuina atan Sakawrhmuituai Tlang tui dahkhawlna hmun a siam tura Concept Paper an siam chu a thil a tawn zen zen loh leh thil lawmawm tak a ni a ti. Sakawrhmuituai Tlang chu cheng Vaibelchhe 939 senga saktur Eco - Adventure Tourism Circuit 9 siam tur te zingah a tel avangin khualzinmite hmunpui a ni dawn tih sawiin Lungdai mipuite pawn remchanna an lak thiam a tul dawn a ti.
LUNGDAI KHUA IN RUIHTHEIH THIL A FIHLIM TE CHAWIMAWINA
Chief Minister chuan faina kawngah te, hrisel kawngah te, Mizo tawng dik chawisan leh hman uar kawngah te, vantlang mipui mitmei ven thiam kawngahte, khawchhung kawngpuite leh kawtthler zah kawngah te Zoram mipuite kan harh a hun tawh thu  a sawi a.  Ramngaw leh nungchaw humhalh pawimawh zia sawiin, "Khawvel ti mawitu leh ti nuamtu thilsiam zawng zawng chungah te a bikin Mizote chu chanchintha hril tel tura koh kan ni a. Nungcha, thing leh mau chunga nunrawn te hi  duhtaka anni Siamtu rilru tihnatna a ni ang tih a hlauhawm hle a ni", a ti. Hriselna chu Mizoram tan tanlak ngai lai ber a ni tih a sawi a; State mihring tlemte in kumtin phai lam a Damdawiin senso atan Cheng vaibelchhe 80 atang 100 a seng ziah chuan ngaihtuahna a ti thui a, hriselna kawngah tanlak a ngaihzia pawh a ti chiang hle a ni a ti.
Hawla leh Pi Rii
Pi Lal Riliani, President, Indian Society on Tobacco & Health, Mizoram chuan Lungdai khaw mipuite chu District khawfai ber nih ah duh tawk lo a; Mizoram a khawfai ber neih tum tur leh vaihlo kaihnawih thil awmlohna hmun an kawchhung siam tum turin a chah a ni. Khaw intodelh ni tur a, khaw hrisel, khaw taima ni thei turin thianghlima bakah ruihtheih thil leh zuk leh hmuama fihlim a pawimawh hmasa ber tih a sawi a. Lungdai khua chu Faina kawngah te,  ruihtheih thil a fihlim kawngah te leh vaihlo kaihhnawih thil a fihlim kawngah te khawdang te tan hmahruaitu ni tura hna tha thawk thawk zel tur leh entawn tura meichher chhieng chhunzawm zel turin a chah bawk a ni. 

Lungdai khua hi in 556 khua niin mihring 2600 bawr chengah an inchhal a. Vawiin programme-ah buatsaihah hian Lungdai VC chuan Sakawrhmuituai Tlang atanga Aizawl leh Aizawl hmar lam a khaw thenkhat tui harsatna hmuna gravity hmanga tui pek dan tur ruahmanna an siam, Concept Paper chu  Chief Minister Pu Lal Thanhawla hnenah an hlan a ni. Chief Minister leh a nupui, Pi Lal Riliani, President, ISTHM, vawiin chawimawina leh lawmna programme a khuallian te chuan  he programme chhunga lawmman buatsaih chi hrang hrang te an aemchhuak nghal a.   Lungdai YMA te hnenah an Hall a hman tur sound system chu Chief Minister Pu Lal Thanhawla chuan a pe bawk a ni. -DIPR

Post a Comment

Powered by Blogger.