Mizo Award 2017 dawngtu Joy Lalkrawspari PachuauMizo zinga chhuanawm bik leh entawntlakte hnena chawimawina hlan ṭhin, Mizo Award 2017 chu December 9, Inrinni khan Prof. Joy Lalkrawspari Pachuau d/o Rev. LB Pachuau, Ramhlun North, Jawaharlal Nehru University (JNU), Delhi-a professor hnenah hlan a ni.

Vanglaini chanchinbu-in kum thum dana an hlan ṭhin, Mizo Award vawi thumna hlanna inkhawm hi Beraw tlanga Convention Centre-ah neih ni a, Vanglaini joint editor Pu Lalnghinglova Hmar-in a kaihruai. Award dawngtu hnenah hian Mizo Award 2014 dawngtu Dr Sangthankima, TNT hotupain Mizo Award 2017 chu a hlan a; Award hian trophy leh Rs. 2,00,000 a keng. 

Joy Lalkrawspari Pachuau chuan, Vanglaini-in zirna lam a ngai pawhmawha academic lama kalte hnena chawimawina a hlan chu lawmawm a tih thu sawiin, "Kei hian academic lam mite aiawhah ka inngai a, academic lam mite aiawhin lawmthu ka sawi. A bik takin, hmeichhe dinhmun thliar loa ang khata kan awm hi ka lawm a ni," a ti. 

Mizo zinga Oxford University, United Kingdom aṭanga doctorate degree la thei awm chhun Joy-i chuan, a nu leh pate thawhrim rah a seng tih sawiin, an chungah a lawm thu a sawi a, "Ka duh ang ang ni thei turin zalenna min pe, ka duhna hmunah kalin, ka duhna hmunah lehkha pawh ka zir thei a ni. Pathian hi ka engkima engkim a ni a, rinna tlemtê kan neih pawhin mal min sawm ṭhin," a ti a; mi ropui ni turin thil tê tak tê tê aṭangin a tawpah a infâwk khawm ṭhin thu a sawi. 

Mizo Award dawngtu Prof. Joy LK Pachuau hi ZONET Cable TV director RK Lianzuala kaihhruaiin kawmna hun hman nghal a ni a, kalkhawmte'n an duhzawng an zawt a ni. 

Joy LK Pachuau chuan, lehkha zir laiin hun hman zat aia zirlai hriatthiam a pawimawh thu sawiin, "Lehkhabuin a tum hre chunga kan zir chuan hmasawnna a awm," a ti.  Khawthlang mite zingah pawh harsa taka lehkha zir tam tak an awm thu sawiin, "Harsatna tam tak paltang turin huaisenna an nei a, harsa taka inzir chhuakte pawh an awm. Mizo zirlaite tan an taimakna leh huaisenna a entawn tlak hlein ka hria," a ti.

Pathian chu engkim ti thei a ni a, Pathian fa a nih avangin a zirnaah hlauh a neih loh thu sawiin Prof. Joy chuan, "Tribal ka nih avangin hnam dang lakah ka inkiltawih duh bik lo," a ti. Mahni tihsual pawm ngam te, tih duh leh châk lutuk neih vanga buai loh a, ngun taka ngaihtuah hmasak a ṭul thu leh teirei peih a pawimawh thute a sawi.

Prof Joy Pachuau chuan, Mizote chu tuna kan nihna ang taka an inphochhuah ngam a ngaih thu sawiin, "Mi dangin min ngaihdan ai chuan Pathian hmuh dan a pawimawh zawk," a ti.

Prof Joy lehkhabu ziah, 'Being Mizo' tih chu India rama history lama pawl intelkhawm sang ber, Indian History Congress chuan kum 2012-14 inkara history lam hawi lehkhabu chhuak ṭha berah a thlang a; Oxford University-a zirlaiin pakhatna a ni a, M.Phil hi distinction-ah pass-in Oxford aṭanga distinction-a pass hi an tam lo hle a ni.

Award hlantu Sangthankima chuan, Joy-i'n Pathian fa a nihna a inhria chu ropui a tih thu leh chu chu tun dinhmun a thlen theihna chhan nia a hriat thu a sawi a, "A chiang ber chu Pathian fa tak a nihna a dinpui ngam kha a ni. Mizoram ro phûm rûk kan hmu ta," a ti.

Joy Lalkrawspari Pachuau hi Centre for Histo­rical Studies, JNU-ah professor a ni a; JNU aṭang hian kum 2004-ah Ph.D. a hmuh bakah, kum 2012-ah Oxford University aṭangin D.Phil. a hmu bawk.

Vanglaini hian Mizo Award hi kum 2011-ah an buatsaih ṭan a, kumin hi a vawi thumna a ni. Mizo Award dawng tawhte chu - kum 2011-ah Brig. T Sailo, chief minister hlui leh kum 2014-ah Sangthankima, TNT te an ni. 

Mizo Award 2017 dawngtu Joy Lalkrawspari Pachuau :

Joy Lalkrawspari Pachuau Chanchin


Zirna lam
* D.Phil.:Being Mizo: A re-analysis of issues of Identity from India’s Northeast’; Institute of Social and Cultural Anthropology, University of Oxford - 2012
* M.Phil:Institute of Social and Cultural Anthropology, University of Oxford - 2006
* Ph.D.:‘Implantation of Christianity on India’s West coast, 16th-17th century’; Centre for Historical Studies, JNU - 2004
* M.Phil.:Centre for Historical Studies, JNU - 1995
* M.A.:Medieval Indian History; CHS, JNU - 1992
* B.A. (Hist):Fergusson College, University of Poona - 1989

Hnathawhna
* Professor, CHS, JNU, New Delhi. 2012 to till date
* Associate professor, CHS, JNU, New Delhi. 2006 -2012
* Assistant professor, CHS, JNU, New Delhi. 1997-2006

Lehkhabu tihchhuah tawh
* Being Mizo: Identity and Belonging in Northeast India, New Delhi, Oxford University Press, 2014
* Christianity in India: Issues of Culture, Power and Knowledge (Tanika Sarkar leh Pius Malekandathil te nen ṭanghoin)
* The Camera as Witness. A Social History of Mizoram, Northeast India (Willem van Schendel nen thawk dunin)

Chawimawina dawn Thenkhat
* Fulbright Nehru Academic Excellence Fellowship, University of Yale, 2016-17
* Being Mizo (2014) chu Indian History Congress, 2015-in 'The Sneh Mahajan Prize for Best Book in Modern Indian History for 2012-14' atan an thlang.
* Honorary Research Fellow, University of Liverpool, 2015 (‘The Household in Portuguese India: A Study of Social Life in the 16th and 17th centuries’).
* Charles Wallace Visiting Fellow, University of Cambridge, 2013 (‘Mizo past through photographs’)

Membership & Activities
* Advisor, Verité Research, Colombo, Sri Lanka (2017-22)
* Member, National Advisory Board, Mizoram University Journal of Humanities and Social Sciences
* Member, Board of Management, Centre for Northeast Studies, Jamia Millia Islamia, (2013-2016)
* Member, Board of Studies, Department of History and Ethnography, Mizoram University  (2013-2016)
* Member, Extended Faculty, NEISP, JNU
* Life Member, Northeast India History Association
* Member, European Association for South Asian Studies, 2012
* Member, Association of Social Anthropologists, UK & Commonwealth, 2012
-Vanglaini

Post a Comment

Powered by Blogger.