MIZO HNAM MARTARTE Nimin Dt. 1.12.2017 (Zirtawpni) khan, Mizoram zalenna sual laia nun chân mi 5-te sakruang chuan Mizo Hnam Run a rawn lawi lut leh ta a, Mizo Hnam Run-ah hian tlai dar 3 khan a hmuahna hun hman a ni.
He hun hi Pu Rochungnunga, President, Ex-MNA Association-in a kaihruai a, martarte sunna hun hman a nih hunah mi hrang hrangin pangpar an dah a. Pu C. Zama, Vice President, Ex-MNA Association-in report a pe a, Pu K. Vanlalauva, Adviser, Ex-MNA Association leh martar chhungte aṭangin thu an sawi a ni.
Vawiina martar sakruang lo lawite Sg. Sapliana s/o Rokunga, Durtlang, 'V' Battalion te; Pte. Ṭanvela s/o Zaia, Saron Veng; Pte. Saizikpuia s/o Chalzawna, Sesawng; Pte. Vanlalthlamuana s/o Bawrhtawna, Vanchengpui, 'CH' Battalion-a mi vek te; Ralliana s/o Khawlṭhuama, Keiṭum, Supply Staff te an ni.
Sgt. Sapliana hi Dt. 18.12.1968-ah East Pakistan-a an chhukthla tur chu West Ṭinghmun daia an awm laiin India sipaiin bei thutin a vanduai ta a ni. West Ṭinghmun hi tunah hian awm tawh lovin Hmunpui aṭanga km 18-a hla a ni. Pte. Ṭanvela hi Dt. 22.1.1968-ah Vanchengpui daiah vai sipai nena an inkahnaah a kephahah an kap hliam a, ramhnuaia a inenkawl laiin Dt. 7.8.1968-ah Chawngtlai daiah vai sipaite'n an kap hlum a ni.
Pte. Saizikpuia leh Pte. Vanlalthlamuana hi 1974 khan Arakan aṭangin duty turin Mizoramah an rawn chhuak a, Lallen rama camp neia an awm laiin Dt. 9.2.1967 khan vai sipaihovin an camp-ah luhchilhin mual an liam ta a ni.
Pu Ralliana hi Dampa Bung DC hnuaia Supply Staff a ni a, Dt.3.2.1969 khan Tripura-ah India sipaiin an kaphlum a. A ruang hi Kawrthah nula leh tlangvalte'n lain Kawrthah thlanmualah an phum a ni. Dt. 29.11.2017 khan Kawrthah YMA leh VC te'n a ruang hi phawrhin YMA member 70 chuang an hnatlang a; Keiṭuma an inah chhohpui niin Dt. 31.11.2017 khan Keiṭumah YMA te'n an lo hmuak a, a ruang hi tlaivarpui a ni.
Heng martar pangate sakruang hi Dt.5.12.2017 (Thawhlehni)-ah Martar Thlanmualah a thlahna hun hman a ni dawn a ni. Hnam martarte sakruang phawrhnaa tha leh zung sengtu, a bikin a huam chhung YMA member-te leh VC te, MHIP leh khawtlang mipuite chungah Ex-MNA Association chuan lawmthu an sawi a ni.  -Mamuana Mizo

Post a Comment

Powered by Blogger.