The Times of Mizoram
Pic: Nin Ravette & Chpi Ralte

Duhawma Kawlni

Vawksa Street


Zinga ka'n thanharh chuan saruakin ka lo mu reng a! Ka bula mu chuan ka hmaiah min thawk khum sâk sâk a, a lung a awi hmel hliah hliah mai. A sakhmel sawngkawn ve tak leh a sam kir chiat mai atang chuan ka bula mu chu veng mawng nuthlawi Vungi a ni tih ral atanga lo hmutu tan pawh hai rual a nih ka ring lo. 

Ka inngaihtuah harh a, ka rilrua thu rawn lut hmasa ber chu "Vungin ka thianghlimna pâr mawi a thliak ta" tih chu a ni; ka thin a rim kher mai. Nizan khan ka rui êm a, ka riah chilh ta a ni tih ka hre chhuak nghal a. Ruak veka kan mut ve ve danah khawsak loh lohin kan khawsa dun a ni tih pawh hrilh nawn ka ngai lo. Ka mumangah ka tleirawl ngaihzawng Nubawihi nen kan lo in-'wrestling' a, a bet zawkah ka tang tluan zak lehnghal; hei vang vek hi a lo nih teh chai hi a! Mangpui ka lo mang satliah awzawng lo a nih hi.

Ka bula la mu âng bui mai Vungi hmel chu ka'n en a, ka lung a awi lo kher mai. A taksa ruak deuh kûng chu ka'n bel chiang a, itawm loh tak a ni; harh fima ani sawngbawl ai chuan bull-dozer pawngsual dawn ta ila ka tha a tho zawk daihin ka ring. Chutiang mi nena 'inkherawlai' khawp khawpa ka lo rui chhia chu ka indem a, ka hawi champ lo chiang hle.

Aizawl khaw mawng lam veng pakhatah, mi zawng zawng kawmthlangah, a in luah lai mi inhnuaiah Vungi nen hian kan mu a ni. Vungi hi kan venga a lo awmna a la rei loh tehlul nen, a lar phian mai. Nuthlawi phanchang tawh tak niin fapa tlangval pakhat a nei a. A eizawnna chu chhungkaw khawsak rel nana mamawh ngai lêm loh, tlai lama paho thenkhat mamawh ni ve ziah si ang chi zawrh a ni. Sawrkarin a man tur zat te bithliah fela chhiah a lak ve ngai lohna bungraw hralha eizawng a nih vang hian nge ni, jail bang a zût fo nghe nghe. 

Ka inlet thawk a, ka rilruah chuan kan veng tleirawl hmel țha, ka thianpa fanu Nubawihi a lo lang a. Nizan khan ar kanpui ka tum kha a ni a. "Kum hlui thlah zan chu ar kang ve ila ti raw?" tia ka sawm khan nui sen sen chungin, "Ni e, ni e," tiin min chhang a nih kha. 

Kum hlui thlah zan a lo nih chuan phûr zetin, ka pain kum thar tuka chhungkaw ei ho veah tia a vauchher broiler ar lian zet, kg 5 awm vel laia rit tur chu ka lo tum lawk angin ka ru chhuak a. Nubawihi hi ka tihlawma a hmangaihna ka dawn phawt chuan mo fel hmel țha tak an nei dawn tihna a ni a, ar sa vawi khat ei kan lo chân phah mai mai chu eng mah a ni lo, a la lawm tur chu anmahni tho alawm, tiin ka phur ngang mai.

Ar lian zet pawm chunga an ina ka luh chuan Nubawihi chu a lo awm der lo mai a; ka hrilh a hai kher mai. A pa chuan hmun danga inkawm hlim tura a thianten an rawn sawm chhuah thu min hrilh a. Kan phone tlang thei lo lehzel chuan ka awm a tinuam lo hle. A lo haw ve leh mai ringin nghah chu ka tum tho va.

Nubawihi pa hi a tlangval laia ka lo kawm țhin a nih bakah an inah hian ka len luh zin ve em avangin min nel a; "Nubawihi awm loh hlanin i ar chu lo ei mai ang, a hre chang tawh lo che a ni ang," tiin min fiam deuh fo nghe nghe. 

Zan a rei deuh hnu chuan, "Lo nghak duh lo mai rawh," tiin min mutsan hlawm nain a lo haw laia ka lo awm loh chuan a hrilh a hai turzia te ka'n ngaihtuah a, mahni chauh pawha lo nghah chhuah ngei chu ka tum tlat a.

Zan dar 11 a ri a, a lo la lang lo; dar 12 a pel a, ka la nghak zel a. Dar khat a pelh chuan Nubawihi pa mu tawh chu a rawn tho chhuak a, "Ngawi teh Jimmy, 'I ar chu ei mai ang' kan tih leh i duh si lo, a khuang ûl ûl reng mai si nen, ka nu a muhil thei lo tlat, mi dang kanpui tur lo va zawng mai ta che," a rawn ti ta nge nge a, ka rilru a na ngei mai.

Mittui nen, hnaptui nen, pawn khawvawta ar ka pawm chhuak leh hnû hnû lai chu tu pawhin min hmu se min lainat ka ring. Min tihmualpho tum ni awm hrimin ka ar pawm lah chu a khuang ûl ûl reng mai a. Rei lo te chhungin vawi hnih zet mai nau hlam êk zah tur zeta tamin min êk khum lehtanghal a. Broiler ar pachal, Kg 5 vel laia rit turin vawi hnih ngawt min ek khum tâkah chuan ka uih 'urhsun' ta hle mai.

Ka lung a awi lo tak zet a ni. Lalsangzuali Sailo zai, "Nun hlui ngaih a sawt lo, kan hma lam i thlir ang" tih mi play te chu "Nubawihi ngaih a sawt lo, kan hma lam i thlir ang" tia min zai elsen khum niin ka hre hial a. Hetih laia ka duhthusam san ber chu: "Vai awmnêm deuh, ka hneh ngei ngei tur hian ka dâr rawn su her se, thinrim hrikthlak nan han hnek bur mai ila" tih a ni. 

Hman deuh khan Nubawihi hi tuma awm loh laiin ka rim a. A naupan lai pawhin ka pawmin a biangah te ka piai fo tho alawm, tiin ka'n zawng hnah nem ban ngawt pek a. A naupan laia ka piai thinna rilru leh a tleirawl hnua ka piai tumna rilru chu a inang tawh lo a ni tih a hre chiang ve viau a ni a ni ang, sikul chawlh laia karate an lo zir thin chu a chhawr tangkai ta a ni; kei erawh chuan kha "karate" kha hmui kawh luaha haw phah nan ka hmang ta thung a nih kha. Kha kha la hre rengin, phuba lak nan ka chungah heti hian a ti a nih te ka ring rum rum mai. 

Chutia rilru baihvai taka kawnga ka kal lai chu Vungi hian min lo hmu a. A inah hian min hruai haw a, hetiang dinhmunah hian kan ding ta a ni tih ka ngaihtuah chhuak ta uaih uaih a. 

"Duat, kan han ti leh lawk dawm em ni?" tih paha Vungin a bawpa min rawn kherh tâkah chuan ka ngaihtuahna kal ding lai ata chu ka harh zawk a. A mal chu ka'n en a, tube-light han tehkhin chi ziazang a ni ve lo, tube-light dum chi a awm te a nih nghal loh chuan. A nui sun sun hmel ka hmuh tâkah phei chuan ka thin a rim ta em em a, "Vungngai, mi sual, min hrai ruia heti hian min khawsakpuia maw?" tih pahin ka thinrim insum zo lo chuan ka rêk a, a sam kir nghing lawih lawih khawpin ka thing a. "Lal Jimmy, min thlah rawh. Ka fapa Remzuala lo haw hunah ka sawisaktir ve dawn khawp che," a rawn ti chhuah chuan ka thlah chiang hle. Meiling ka hum palh ta emaw tih tur khawpa rangin ka kut chu ka la thla a. Chu hming chuan ka thinlungah awmzia a nei lutuk tlat. 

Vungi fapa Remzuala hi boxing lo zir sil ve nual tawh, Mizoram tihmingtha tura medal hnek chhuak khawpa thiam ni si lo, veng chhunga inla champ tawk vela thiam ang chi hi a ni. Hman deuh khan a nu thil zawrh ka batsak chungchangah kan thu a inhmu lo tawh a; aia upa zahna tel hauh lovin a thiam thil hi min temtir nual tawh a ni. Film velah hian pate awmnem tak takin palian chak awm fe fe an hnek thlu duai duai ka hmu fo a; mahse, lemchan mai mai a ni tih hemi tum hian ka hre chiang hle. Ka duh vang reng ni miah lova ka ding lam leh vei lam ka thlek tawn zak zak hnuah chuan tukkhum lei vaw chawrhin ka thal dêr mai a ni.

'Camera-trick' tel miah lova Remzuala hian min 'sobji' leh hma ngeiin ka thlawh chhuah ran a ngai a ni tih hre thiam tura finna ka lo nei hlauh chu ka lawm ta em em a. Ka inha sawk sawk a, kawr pawh kilh tha mumal hman lovin tlan chhuah nachang ka hre ta a ni. 

Kan in ka thlen hnu chuan Nubawihi pa, thianpa Tluangan min rawn phone a, "Tunah khan Remzualan a rawn um che; a hmuh hun hunah che khawih che a tum thu a sawi. Lo chhuak suh. Nizanah a nu nen in mu dun a ni maw?" tiin min rawn hrilh ta mai a! Ka rin ai daihin Vungi ka riahpui thu chuan kan veng a luah khat rang dawn a ni tih ka hre thiam nghal a.

Ka nu chuan min hlauhthawnpui hmel takin , "Jimmy, nizanah ar i ru chhuak a ni maw? I pain a vuak hma chein tlan chhuak rang rawh, a thinrim a puak keh lo chauh a ni, tuikawhna nen a zawng che a nia!" a rawn ti lut ve bawk a.

Remzuala kuttum hmabak bawk, ka pa vuak hmabak bawk, Vungi mutpuitu tia mualpho hmabak bawk; kum hlui thlah zan manhla tak zawng ka va hmang lo chiang tak! Heng zawng zawng hi Vungi vang vek a ni, Vungi vang vek!


Post a comment

Powered by Blogger.