29th December, 2017 (MSR) : "Mizo tawng hi tawng hrang ena en lovin, insuihkhawmna tawng, hnam anga inpumkhatna siamtu-ah hman ni se a tha hle ang" Chief Minister Pu Lal Thanhawla chuan a ti.
Vawiin khan Manipur-a Zo hnahthlak zinga Media-a thawk, Journalist 7 te chuan, Chief Minister Pu Lal Thanhawla a chenna Bangla-ah an kawm a. State pawn lama Media lama thawk Zo hnahthlak Journalist te hian Mizoram Chief Minister chu Zo hnahthlak zawng zawngte tan pa ber chanchang a nih thu hrilhin Zo hnahthak hnam peng hrang hrang ten inpumkhatna tha zawk kan neih theihna atan chak leh zuala hma la turin an ngen a ni.
Chief Minister Pu Lal Thanhawla chuan Zofate chu Pathianin a siam danglam bik nia a hriat thu sawiin, "chenna te hrangin tawng hrangte pawh hmang hlawm mah ila inbe pawp thei vekin kan tawng kan in man tlang a; hetiang ang hi hnamdangah a awm ve lo" a ti. Pu Hawla chuan "Duhlian tawng, a hnua Lusei tawng, a tawpa Mizo tawng lo ni ta phei hi chu Zo hnahthlak hnam peng hrang hrang ten kan hrethiam tlang deuh vek a. Tawng hrang ena en lovin insuihkhawmna tawng, hnam anga pum khata kan insiamna leh inpumkhatna tawngah hman ni thei se a tha hle ang" a ti.
Mizoram Chief Minister Pu Lal Thanhawla chuan "Mizo han tih hian, Mizoram chhung bikah pawh Mizo han inti bik tur tumah kan awm chuang lova, Mizo nihnaah lungrual tlang ila, chu chu a pawimawh ber a ni. Heihi Mizoram chhung leh pawn lam thlengin hnam anga Mizote min ti zahawmtu leh ti chaktu a ni ang" a ti bawk.
Chief Minister chuan "Hmarchhak state-a hnam hrang hrang zingah, Nagaland bik phei hi chuan Naga nihna neitu bik pakhatmah an nei lova; Mahse an state pawnah chuan Naga tihah lakhran theih loh khawpin thukhat an vaw tlang thei a, a an entawn tlak hle a ni" a ti.
Mizoram mipuite pawh state pawna Zo hnahthlak unaute, Mizoram an Jerusalem anga en thinte chungah that chhuah a tul thu sawiin, an tawng hman leh an khawsak danah lo danglam deuhte pawh zawldawh taka enturin mipuite a chah a ni.
MJA President Pu Vanlalrema Vantawl leh a thawhpui, MJA member ten Chief Minister Pu Lal Thanhawla hi an tawiawm a ni.
Manipur Journalist te hian nimin tlai khan Aizawl Press Club tlawhin MJA member te nena inkawm hona hun an hmang bawk.
Post a Comment