Chief minister Lal Thanhawla chuan nimin khan Thenzawl a tlawh a, Thenzawl khuaa MUP-te nen MUP Rûna an inkawmnaah, Mizo ṭawng humhalh a ṭul thu a sawi.
Lal Thanhawla chuan, ṭhangtharte'n Mizo ṭawng an tichhe mek zel nia sawiin, "Hei hi thil ṭha lo tak a nih avangin a siamṭhat hna thawka pên chhuak turin MUP chuan mawhphurhna pawimawh tak an nei a, Mizo ṭawng hi kan humhalh a ṭul tak zet a ni," a ti.
Thenzawl awmna chu ram laili a nih avangin hma lam thui tak thlir chungin sorkarin nasa takin a chei mek tih sawiin CM Hawla chuan, "Thenzawl mipui tan chauh ni lo, Mizoram pumpuiin an chhawr tur hmunhmate siam mek a ni," a ti a; Thenzawl mipuite chuan kawng tinrengah changkan an tum mai bakah, mi dangte pawh rilru inhawng taka an lo dawnsawn theih zel a pawimawh thu a sawi.
Chief Minister chuan, sorkar department ṭhenkhat, sum siam tumte'n Mizo pipute sûlhnu hlu tak tak, pipute hun laia an hmanraw hman pawh ni lo hmangin an chei chhe chiam zel niin a sawi a, "Hei hi thil vanduaithlak tak a ni. A awmna khaw chhung mipuite'n in dodal tur a ni a, an tihchhiatsak che u in phal tur a ni lo," a ti.
Phai ramah leh khawvel ram changkang zawkahte thil siam chhuahna kaihhnawihin boruak a tichhe nasa tawh tih sawiin Lal Thanhawla chuan, "Chutianga khawsate chuan Mizoram hi an rawn tinzâwn chho zel a, boruak thianghlim an duh bakah, kan pipute sûlhlu hi a nih ang angin an hmu chak a ni," a ti a; khualzinte'n step, building leh kawng siam chawpa kal an inbeisei loh thu a sawi.-Vanglaini
Post a Comment