Ṭangrual pawl, Zoram Peoples' Movement (ZPM) in 'Mipui Buhzém' an tlangzarhṬangrual pawl, Zoram Peoples' Movement (ZPM) chuan Mizoramah kalphung thar, mipui sorkar a pian theihna tura a duh apiang tana pawisa thawh theihna tur 'Mipui Buhzem' an siam a, nimin khan Aizawl Press Club-ah an tlangzarh.
Mipui Buhzem tlangzarh inkhawmah hian ZPM Finance Co­mmittee chairman F Rodingliana chuan, tuna Mizoram kalphungah chuan MLA candidate-te laka beisei nei ṭhinte avangin candidate ni turin sum tam tak sen a ngaih thu a sawi a, "Ram leh hnam tana thawk thei tur mi ṭha aiin, hausa leh mi neinung zawk, sum tam tak tak hmang theite chanpualah kan ngai ta mah mah a ni," a ti.
Bial mipuite aia mimal hamṭhatna ngaihtuah lo thei loin MLA-te siam an nih ṭhin thu sawiin F Rodingliana chuan, "Hei hian ram hmasawnna tiṭhuanawpin, ram leh hnamin a tuar ṭhin. Mipui kan ṭhanharha kan insiam ṭhat a ṭul ta hle. Kalphung tharah chuan mi dik leh ṭhate tan kawng hawn a ni ang," a ti a; hausa lo mah se, ram leh hnam kawng dika hruaitu tur mipuite'n an vawrh chhuah tur thu a sawi.
F Rodingliana chuan, kalphung tharah chuan mipuite'n inthlan laia therhlo an beisei ṭhin bànsanin, candidate-te chhâwk zângkhaina rilru nen an dawngsawng tawh zawk dawn niin a sawi a, "Ram kalphung thar tur thlir chungin, inthlan kan hmachhawn thei tawh zawk dawn a ni," a ti a; kalphung thar leh mipui sorkar a pian ngei theih nan Mipui Buhzemah mahni phal tâwk sum thawh turin mipui a sáwm.
Zawhna chhangin ZPM Finance Committee hruaitute chuan, Mi­pui Buhzema sum tling­khawmte chu an pawl candidate-te hnenah a inzatin an sem dawn tih an sawi a, "Thil ṭul leh pawimawh hrang hrang atan a inzatin kan sem dawn. Hei hian candidate-te'n mahni sum an sên vak vak a, a hnua sum sen tawh hmuh lêt tuma mahni hamṭhatna tur an ngaihtuah leh si a tibo dawn a ni," an ti.
Mipui Buhzem account kimchang chu A/C No.: 97008723294, Mizoram Rural Bank (MRB), Treasury Square Branch, IFSC: SBIN0RRMIGB a ni. -Vanglaini

Post a comment

Powered by Blogger.