Tichuan, an tlukna mah khawvel tihhausakna a niha, an kiamna mah Jentail-te hausakna a nih bawk chuan, an famkimna chu an hausakna a va ni lehzual dawn em! Rom 11:12
MIZO THUZIAK LAWRKHAWM :: ISRAEL-TE TUN DIN LEHNA HIKhawvel pian tirha talh tawh beramno chu thutiam anga tlantu beramno Isua Krista lo pianna lamah kan rilru a luangliam mek a. Nova fapa Hama (Gen 10), Nova mu lang khuh ta mai lova a unaute hrilhtu chuan Kusa a hring a, Kusa chuan sa pel chak tak fapa Nimroda a nei a. Nimroda thih hnu chuan a nupui Semerami thiltithei tak zirtirna atanga hman tan chauh thil hi kohhran kal sual chuan kohhran thanlennan kohhrana a lak luh tak dan te chu hun dang atan dah ta ila.
Pu Trump-a chuan khawchhak lama Jerusalem khawpui chu Israel-te khawpui tia a pawm thu khawvel hmaah a puang ta mai hian Jehova Pathian bia te ngaihtuah a ti thui lo thei lo a ni. Paulan Rom 11:11 “A nih leh, an petek chu an tluk hlenna tur em ni?” tiin a chhannaah, chu rin lohna chu “Hnai lo ve.” tih kan hmu a ni. Tichuan, Israel rawn din chhuah lehna tur thu hi Bible hmun tam takah kan hmu a ni.
He, sual thim khawvela Beramno tlanna thutiam chu rawn thleng famkim nghal tawp tawp thei mai a ni bik lo va, kawng hrangin hrangin kawng lo sial lawkna a awm dan te kan thlir thiam a pawimawh hle a ni. Pathianin Israel a tih leh chu Israela thlahte Israel, Israel chi hnih Bible-ah kan hmu a. Khawvel pian tirha talh tawh beramno thuthiam avang chuan rinnain Abrahama chuan thiam a lo chang tawh a, chutiang zelin thutiam avang chuan thiamchanna beiseiin ran thisenin an lo inthawi thin a ni. Chu, tlanna beramno thuthiam chu hlen a la nih loh avangin Israela thlah zinga hnam pakhat Levi chi chu Pathianin puithiam hna thawk turin a thlang a ni. Hebrai 10:14 “Thilhlan pakhat chauhvin tihthianghlim tawhte chu chatuan atan a tifamkim tawh si a.” tih a nih chin, kraws hnuah erawh chuan kan tan hmun siamin vanah a kal ta a ni.
Timothea chuan, Isua vana a thiltih chu hetiang hian a sawi a I Timothea 2:5 “Pathian leh mihring inkarah Palai pakhat chauh a awm bawk a, amah chu mihring a ni, Krista Isua.” Tirhkoh Paulan, Isua vana a thiltih chu hetiang hian a sawi ve leh a. Hebrai 14:14-16-ah “Tichuan, vanahte kal tlang tawh Puithiam Lalber ropui tak, Isua, Pathian Fapa chu kan neih avangin kan thurin hi i pawm tlat ang u. Puithiam Lalber, kan chak lohnate min hriatpui thei lo nei kan ni si lo; keimahni anga kawng tinrenga thlemna tawk tawh, sual erawh chu sual lo, nei kan ni zawk e.” tiin min sawipui turin puithiam (ukil) hna min thawh sak tak zia kan hmuh avangin sual ngaihdamna chang tura ran hlanna leh mihring puithiamnate chu a tul tawh lo a ni.
Tichuan, Israela thlahte chu Israel an nih mai zel danah hi chuan kan chiang tlangin a rinawm a, Isua erawh chuan Abraham thlahte ngei pharisai te kha Abrahama thlah in ni lo a ti a nih kha. Johana 8:39 “Abrahama fate in nih chuan Abrahama thil in ti ang chu. 40Nimahsela, tunah mi thah in tum si. Pathian hnena thutak ka hriat hrilhtu che u ka ni asin; Abrahama zawngin hetiangin a ti lo ve.” tiin Isuan Abrahama Abrahama fate an nih loh zia an nungchang avangin a sawi a ni. Paula chuan Rom 9:7 Abrahama thlahte an nih avangin an zain a fate an ni vek hek lo; “Isaaka-ah hian i thlahte an ti ang,” tih a ni zawk. 8Chu chu, tisa fate chu Pathian fate an ni lo va, thutiam fate chu Abrahama thlaha ruat an ni zawk tihna a ni.” tih kan hmu ang hian beramno tlanna thutiam kawh tum hi kan thlarau mita kan hmuhthiam a pawimawh hle a ni. Thutiam thil tum hmuhthelhna hian khawvel ropuina lamah min hruai lut a, he ‘hnam thlan’ nihna hi chhandamna emaw intihnate a awm phah a, chuvangin Paula chuan, ‘vanram khi puithiam hna tha taka thawh avanga chan theih tur ni ta se chuan kei hi a chang turte zinga mi ka ni ve ngei ang,’ a lo ti hial a ni.
Tichuan, Lal Solomona fapa Rehoboama BC992 hunah chuan (II Chro bung 10)Israel hnam sawm te chu hmar lamah awmin hnam hnih te chu chhim lamah an awm hrang ta a. Hnam sawm hmar lama awm te chu ‘Israel’ ti a koh an lo ni ta bik a, chhim lama hnam hnih Juda leh Levi te erawh chu ‘Juda’ ti a koh an lo ni ta a ni. Tichuan, Israel hnam sawm, hmar lama awm, Israel ti a koh te chu Assuria hovin an man a, sal an ni ta a ni. Assuria sawrkar chuan an sal man te chu ram tinah thawn darhin an va awmna ram mite nen an inneih pawlh a, Israel angin an chanchin hi tun thleng pawhin hriat tur a awm tawh lo a ni. History-ah, Israel ramah chung hnam sawm te chu an rawn kir lehna chanchin hmuh tur a awm tawh lo a ni.
Khawvel chhandamna tur kawng chu Setana lalna khawvelah hian Israela chuan a dampui zo lo deuh thaw dan te kan hmuhthiam a tul a ni. Chuvangin, Thupuan 7 leh 14 –a Israel hnam sawm leh hnam hnih a sawi te hi thisena Israel tak te sawina a ni lo tih a chiang hle a ni. Israel hnam sawm te chu an chi a boral a, Israel hnam hnih te erawh chu an helna avangin Babulon leh Persia salah an tang ve leh a ni. Persia sala an awm lai chuan chung Israel hnam hnih sala tang, Israel hnam hnih te chu Jerusalem-a kir ta te chu an ni ta a ni. Tichuan, Jakoba mumanga lei leh van dawhzawm leihlawn thu chu, Jakoba thlah kal zel, nula thianghlim Mari-ah Thlarau Thianghlim hnathawhin a lo rai ta a, Thlarau Thianghlim fapa tih ni lovin, Israela thlah Israela, Pathian Fapa a nih zia, Baptisma a channaah van atangin Pa Pathianin a rawn nemnghet a ni.
Israel fate khan felna dan chu thiltih hmuh theih anga umin, felna an chan/dawn theih tak loh nachhan chu an thiltih vang ni lovin rinnaa an um tel bawk loh vang a ni. Chu, rinnaa an um tur chu enge ni kan tih chuan, khawvel pian tirha talh tawh beramno tlanna thutiam avanga ti an nih tawh lohna leh chu thutiam hlen tura tlantu beramno tisaa lo piang Isua chu an rin loh avangin, ‘Tlukna lungah chuan an tlu si a;” tih a ni a, Bible-a lung tih hi Isua Krista sawi na zel a ni. Khawvel pian tirha talh tawh beramno tlanna thutiam rinnaa nungte zingah chuan Abela, Nova, Abrahama, etc te an ni a, kawng hrang hranga thlarau hnehna changtu an nih dan kan hriain a rinawm.
Jentail te chu Rom11: 17 ...olive thinga thatna zung tawm ve tawh i nih chuan, zar dangte lakah chuan inchhuang suh. tiin tlanna chanchin tha chu Jentail ten kan lo puan ve theih tak avanga inchhuang tur kan ni chuang lo min ti a. ‘Inchhuang mah la, nang chu a zung chawmtu i ni lo va, a zung chu a chawmtu che a ni zawk e.’ tiin ‘a zung’ tih hi thil hnar, thil bul sawina a ni a, Isua Krista a kawk a, a zung chuan thing zar zawng zawng a chawm angin, keini Jentail ni thin kha rinnaa Israel thing zar kan lo nih ve tak chinah chuan Isua Krista nunna thing zunga chawm ve bawk kan ni a ti a ni. 21 ‘Pathianina zar takte chu a zuah si loh chuan nang pawh a zuah bik lo vang che.’ tiin min vau lawk a ni. Nimahsela, a zar tak (Israel) ten an tlukna lung chu an rin hunah chuan 24...’chung a zar tak takte chu anmahni olive thing pangngaiah chuan zawm an va ni dawn nasa em!’ tiin Paula ang mi an nih tur thu kan hmu a, tlanna thutiamin Israel thlahte a tinzawn bik loh zia kan thlir thiam a tul a ni.
He, Israel-te tun din lehna hi, eng vanga nghahhlehawm leh ropui tur nge a nih kan tih chuan Rom 10:17 “Chutichuan, rinna chu hriatna avangin a lo awm thin a; tin, hriatna chu Krista thu avangin a lo awm.” tih a ni angin keinin hria kan intih aia nasa leh tamin anin hriatna an neih dawn dan te kan ngaihtuah thiam a pawimawh a ni. Chu, hriatna nasa tak avang chuan Abrahama te, Paula, etc te angin an rinna a nasa hle dawn a, Isua Krista tlanna chanchin tha chu nasa taka en pui theihna an neih bik vang a ni, chuvangin, Israel-te tun din lehna hi thlarau lam thil a ni.
Israela thlahte chu Israel tih an nih laiin Israel lo zawng chu Jentail-te tiin kan inthen a, Jentail tih awm zia chu Setana ruala boral hlen tur te sawina a ni a, Jentail tih hi thlan bik Israel tih a lo awm vang a ni. Israela thlahte hi an famkim bik hauh lova, Pathian Khawngaihnaa tlan vek kan nih dan te hi kan theihnghilh loh a pawimawh a ni. Tichuan, kraws hnuah, thutiam hlenna tura tisaa Israela thlah nih pawimawhna a awm tak loh avangin rorelna ang khat hnuaiah kan kun ta vek a ni tiin Rom 11:32-ah Pathianin a khawngaih vek theih nan mi zawng zawng awih lohnaah a khung ta vek si a.” tiin kraws hnuah chuan Jentail kan nih tak vek zia kan hmu a ni.
Rom 12:4 Taksa pumkhatah peng tam tak kan nei a, peng zawng zawng thiltih erawh chu a inang lo va; 5chutiang bawkin keini tam tak ni mah ila, Krisataah chuan taksa pumkhat kan ni a; a mal malin inpeng tawn theuh kan ni. 6Khawngaihna min pek angzia zelin thilthlawnpek hrang hrang kan nei theuh va, thuhril tur a nih chuan kan rin tawk ang zelin i hril ang u; 7rawng bawl tur a nih chuan rawng i bawl tlat ang u; zirtirtu pawhin zilh tlat rawh se; thil petu chuan ui lovin pe rawh se; roreltuin taima takin rel rawh se; mi khawngaihtuin lawm takin khawngaih rawh se.” tiin Tirhkoh Paulan a tlip a ni. Chuvangin, ‘Israel-te tun din lehna’ tih hi Krista leh Setana indonaa thlarau lam thil a ni.

MIZO THUZIAK LAWRKHAWM :: ISRAEL-TE TUN DIN LEHNA HI : 

By -  Rohmingliana Jahau

Post a Comment

Powered by Blogger.