National Health Mission (NHM) hnuaia State Quality Assurance Unit bultumin Mizorama damdawi-in fai inelna, Kalyakalp Award chu nimin khan Central YMA Hall-ah sem a ni a, district hospital fai ber atan Aizawl District Hospital (Civil Hospital) thlan a ni.
Lawmman sem inkhawm hmanpuitu Health minister Lal Thanzara chuan, Kayakalp chu Mizorama sorkar damdawi-inte’n an ṭhatpui thu sawiin, "Damdawi-in leh a chhehvel vawnfai mai bakah, a chhung lam inrelbawlna leh inenkawlna kawngah pawh nasa takin an hlâwkpui a, mipui pawhin an ṭangkaipui a ni," a ti.
New Delhi leh Guwahati-a meeting neih ṭumin Mizoram chu hma la chak ber state zinga a tel thu sawiin Minister chuan, "Chutiang a nih theihna chu department thawktute mai bakah, khawtlang hruaitute leh khaw mipuite ṭawiawmna vang a ni. Faina hi vawi khat thawha duh tawk mai chi a ni lo a, eng lai pawha chhunzawm reng ngai a ni," a ti a; Kayakalp hnuaia hmalakna chu endik zel tum a nih thu a sawi.
Sorkar thuchhuah tarlan danin, Kalyakalp-in a tum ber chu - mihring hriselna lama inenkawlna hmun, damdawi-in leh public health facilty reng reng fai taka enkawl leh natna hri darh thei (infection) tihtlem a ni. India ramah chuan May 15, 2015 khan hawn a ni a, Mizoramah chuan July 9, 2015 khan hawn niin, a tirah chuan district hospital chauh huamtir a ni.
Kumin 2017 hian a huam chin zauh a ni a, district hospital, sub-district hospital (SDH), community health centers (CHC), primary health center (PHC) leh urban primary health center (UPHC)-te a huam.
District hospital zinga fai bera thlan Aizawl Civil Hospital chuan Rs. 6,00,000 leh thuchei an dawng a, pahnihina Lawngtlai District Hospital-in Rs. 5,00,000 leh pathumna Champhai District Hospital-in Rs. 4,00,000 an dawng.
SDH leh CHC zinga fai ber chu Biate CHC a ni a, Rs. 6,00,000 an dawng a; pahnihna Sakawrdai CHC-in Rs. 5,00,000 leh pathumna Vairengte CHC-in Rs. 4,00,000 an dawng.
Post a Comment