Ṭangrual pawl, Zoram Peoples' Movement (ZPM)Ṭangrual pawl, Zoram Peoples' Movement (ZPM), Lunglei district chuan thuchhuah siamin, ZPM-in sorkarna an chan chuan Chawngte-ah IR battalion pakhat dah a nih dawn thu leh, dan loa Mizorama Chakma pêm lut zawng zawng dap chhuakin, an rama  thawn haw vek an nih dawn thu an tarlang.
Lunglei ZPM chuan, Pathian leh mipuite zara sorkarna an siam chuan, dan loa Mizorama pem lut Chakma-te awlsam têa hriat an nih theih nan Mizoram pumah village register ṭha taka kalpui a nih dawn thu an sawi a, "Zoram mipuite pawh hnam thilah chuan ṭangrual thiam deuh deuh turin kan ngen a ni," an ti a; nakkum 2018-a ram hruaitu tur inthlanna lo awm turah Chakma-te vote duh vanga dan loa rawn pêm lutte vulh lian ṭhintu Congress leh MNF party-te hnâwl turin mipui an sawm a ni.
Tun hnaia Bangladesh aṭanga Chakma chhungkua Mizorama pêm lut an awm chungchanga Tlabung MZP-in FIR an thehluh bawhzuia kal Mizoram police-te chu Chakma-te man ngam loa hawsan an nih an rin loh thu sawiin Lunglei ZPM chuan, "Takam ho ram dinsaktu leh vawi duai lo an thlavang hauhsak tawhtu Congress sorkar hian police-te kut a hnungkhirh vanga man loa haw leh zawk an nih kan ring," an ti.
Chakma foreigner chungchanga Tlabung MZP leh YMA hruaitute hmalakna chu an thlawp thu sawiin ZPM chuan, "India sorkarin ramri veng tura a dah BSF-te'n ram neitu Mizote aia Takam an ṭan zawk tlat ṭhin leh an hum ṭhin hi ṭha lo kan ti hle," an ti a; Bangladesh nena ramrite chu MAP-te'n an ven theih nana sorkar laipui nawr turin Mizoram sorkar an phût a ni.-Vanglaini

Post a comment

Powered by Blogger.