HOME MINISTER IN MZU LIBRARY HAWNNA LEH NATIONAL DEFENCE ACADEMY TLING THAR CHAWIMAWINA HUN A HMANPUINational Defence Academy-a Mizo tling thar lawmpuina leh Library thar hawnna inkhawm vawiin khan Mizo Zirlai Pawl chuan an headquarter-ah an buatsaih a, he hunah hian Home Minister Pu R. Lalzirliana chu khuallian a ni.

Home Minister chuan MZP Library thar chu thalaiten zirna kawnga hma an sawn theihna tura sak a nih ang ngeiin tangkai taka hman a nih a beisei thu leh uluk leh tha taka enkawl zui zel se a tih thu a sawi a. Tunlai khawvel thiamna thang chho zelah lehkhabu chhiar kan thlahdah telh telh a, social media lama kan thil chhiarte hi kan duh tawk mai emaw a tih theih a. Mahse lehkhabu tha tak tak chhiar tam hi tun thleng pawhin mi fing leh rawn tlak siamtu a la ni fo a ni, tiin lehkhabu chhiar uar zel turin thalaite a fuih.

Minister chuan NDA a tling thar pahnih te chu a lawmpui thu sawiin, an hmabak turah an zirna lo harsa in lo hahthlak deuh pawh ni se tumruhna nen bei zel turin a chah a, Mizoram tan mi tangkai tak an nih ngei a beisei thu a sawi a. Thalaiten zirna lama beihpui an thlak thar leh tul a tih thu leh, zirna lama hmasawn leh taimak chu ram leh hnam humhalh theihna kawng pawimawh tak a nih thu a sawi a. Central Service-ah Mizo thalai tam zawk an luh chuan a chhawr tangkai tur chu Mizo mipui bawk an nih tur thu a sawi a. Chumi atan chuan mi taima, hnathawk peih kan tam a tul a ni, a ti. Khawpuiah a leng leh lenglo a inkhuar vek tum lova Mizoram puma rualkhai taka hmasawnna a thlen theih nan sorkar hnathawkte pawh sorkarin a dahna hmunah awm zel thin se a duh thu a sawi. Pu R. Lalzirliana chuan thalaite pawl hrang hrangah te inhmangin, chung pawl te chuan a tha zawnga ram khalh ngil hna an thawk thin chu lawmawm a tih thu a sawi a. Chutihrual chuan pawl leh party leh thil dang dang pawh, kawr ah chauh hmanga mahni mimal hamthatna lo zawn erawh a thil tih awm a nih loh thu sawiin, "hnam hmangaihna hi kan chetzia leh thiltih ah a langchhuak thin tih hriat reng a pawimawh" a ti a ni. Home Minister hian Krismas leh Kumthar lo awm turah halpuah hal lo a hun nuam leh muanawm tak hman a nih theih nan MZP member-te chu theihtawp chhuahpuiah a sawm bawk.

MZP Library hawn tak hi Rajya Sabha MP Pu Ronald Sapa Tlau in MP Fund atang cheng sing nga a pek hmanga sak a ni a. A zau zawng hi a dung feet 30, a vang feet 20 a ni a, June ni 7, 2017 khan sak tan niin July ni 31, 2017 khan zawh a ni.

National Defence Academy a tling thar chawimawi te hi Lalrinawma Sailo, Chanmari, Aizawl leh Malsawmzuala, Zarkawt, Aizawl te an ni. -DIPR

Post a Comment

Powered by Blogger.