Mizoram Kohhran Hruaitute Committee (MKHC) chuan Krismas leh kum thar thuchah an tichhuak a; Mizoram mipui zawng zawngte Krismas leh 2018 kum thar chibai bûkin, thlamuang leh hlim taka hunpui hmang turin duhsakna an hlan.
MKHC chuan, Kristiante hunpui hman chhungin mi tinin thlamuang leh hlim taka an hman theih nan hâlpuah leh hâlmawi reng reng hal lo turin mi tin an ngen a, "Hâlpuah ri hian lung ṭha lo te, damlo leh tar chak lote tan thlabârna leh mut ṭhat theih lohnate a thlenin, nunna hial an chan phah thei a, kan hlimna hunpui ni tura kan ngaih hi kohhran leh khawtlang mipui tan vanduaina hunah a chantir thei a ni," an ti.
MKHC chuan, hunpui chhung hian páwn lam hlimhlawp, nulat-tlangvalna leh zu leh ruihhlo lam chi reng reng buaipui lo a, Pathian chibai bûkna hmun lama rilrute dah a, hunpui hman chhan ber Lal Idua piang chibai bûk turin mi tin an chah a ni. -Vanglaini
Post a Comment