Mizoram Pradesh Youth Congress Committee (MPYCC)Mizoram Pradesh Youth Congress Committee (MPYCC) chuan nimin khan BS Farm-ah intihhlimna hun an hmang a, MPYCC president Dr Lalmalsawma chuan, Congress ṭhalai chu party dang ṭhalaite ang an nih loh thu a sawi.
Dr Lalmalsawma chuan, Congress ṭhalaite chu an hruaitute'n nakin zela ram hruaitu ni turin leh ram hmangaih tura an zirtir thu sawiin, "Keini chu tharum thawh lam ti chi kan ni ve lo. Politics-ah chuan thuin thil kan inchuh a, a dik zawk an dingchang ṭhin. Tharum thawhna chi a ni lo a, lung vawm vak vakte kan ti ve lo," an ti a; Congress ṭhalai member-te chu party dang ṭhalaite anga awm lo turin a chah.
MPYCC President chuan, Congress sorkar aia ṭhalaite tana sorkar ṭha a la awm ngai lo nia sawiin, "Infiamnna lamah ṭhalaite'n hlawhtlinna an chang mek a, hei hi sorkarin infrastructure ṭha leh kalphung thar min pek vang a ni. Tun hmaa civil service-a phaia lehkhzir leh coaching class kal theite chauh an tlin ṭhin laiin, tunah chuan Mizorama zir chhuakte pawh an tling tawh. Hei hi kan education system-in hma a sawnzia a tilang," a ti.
Inkhawm hi MPYCC vice president F Lal­hmangaiha'n a kai­hruai a, an member thi mi pathumte sûnna hun an hmang a ni. -Vanglaini

Post a Comment

Powered by Blogger.