Aizawl District V/C Association (ADVCA) conference, December 5, Thawhlehnia neih chuan resolution pass in, Mizoramah village council hming bo si loin Panchayati Raj Institution (PRI) zûlzuia V/C thuam chak leh thingtlang lama tualchhung inrelbawlna neiha hman nghal an duh thu an tarlang.
ADVCA chuan, India ram pumah thingtlang lam rorelna, PRI an kalpui deuh vek tawh nia sawiin, PRI hmang chuan sorkar laipuiin state tin tan sum tam tham tak a ruahman ṭhin niin an sawi a, "Mizoram sorkarin V/C zawnga min la kalpui tlat avang leh thingtlang lam tualchhung inrêlbawlnate thuam chak thuah duhthusam lohna a tam avangin Finance Commission-in sum min ruahmansak thei lo a, Mizoram thingtlang hmasawnna tur cheng vbc. 200 chuang kan chán tawh hi pawi kan ti tak zet a ni," an ti.
Mizoram sorkarin Vanhela Pachuau, IAS (Rtd.) kaihhruai Mizoram State Finance Commission (MSFC) ruahmanna pawm sia kum 2015- 2020 chhunga V/C-te kalphung leh sum hmuhna tur a ruahman ang a zâwm leh si lo chu pawi an tih thu sawiin ADVCA chuan, "Panchayati Raj anga lut si lo a, kalphung mumal loa V/C dinhmun dah reng hi democracy kalphung piah lam leh mipui rorelna rahbehna a ni," an ti a; V/C kalphung chu PRI zûlzuia kalpui an duh thu an tarlang.
ADVCA chuan, Mizorama sorkar ding tawhte chu thingtlang lama tualchhung inrelbawlna (V/C) chawikan tum ngai loah an puh a, "Thingtlang lam tualchhung rorelna ngaihthahna hi democracy rorelna palzûtna a ni a, Mizoram hmasawnna kawng daltu lian ber a ni," an ti.
ADVCA chuan, MGNREGS hnuaia Village Employment Committee chu ṭhiah an duh thu an puang a; khaw chhungah mipui aiawh V/C-te leh Central guidelines-a committee an siamte chu a ṭhat tâwk thu an tarlang.
ADVCA Resolution dangte
1.V/C tinin khua leh tui dik takte chanvo humhalhsakin, ram páwn mi leh sate khaw chhunga seng luh leh khawsaktir loh ni se. Khaw chhung hmasawnna tura sum leh pai hmanna reng reng mipui vantlang tana hriatpui leh langtlang thei ang bera rorelna kalpui hi V/C rorelna kalhmang a ni tih hrereng ang u.
2.NEDP hi an thawhna tur khaw neitu V/C-te remtihna leh hriatpuina tel lo chuan sorkar hian kalpui tawh lo se. Khawtlang neitu V/C thlawh khûma duh lai lai NEDP work tur siam hi V/C-te rahbehna leh palzutna a ni. Tun aṭang chuan V/C-te hriatpuinaa pek ṭhin tawh ni se, V/C-te'n completion certificate an pek loh chuan pawisa hi sorkarin pe tawh suh se.
3.V/C-te'n kaihhruaina kan hman mek heng, hnatlang phatna Rs. 25 leh inrûnna Rs. 50-te hi tunlai pawisa hlutna chhûtin a tlem tawh a, tunlai pawisa hlutna mila ennawn thuai turin sorkar kan phût.
4.MGNREGS sanction order hmuh hnu leh mipuite'n an thawh zawh vek hnua pawisa rei tak mipuite'n kan nghak ṭhin hi a rang thei anga sum release ṭhin tawh turin sorkarin hma la rawh se.
5.V/C member thi emaw, báng emaw an awmin a rang thei ang berin sorkarin bye-election buatsaih ṭhin rawh se.
6.Aizawl khaw chhungah zokhaw lama V/C-te innghahna/thlenna tur sorkarin V/C Hostel min siamsak rawh se.
7.District, divisional & sub-divisional hqrs, V/C area leh administrative area siamṭhat a nih dawnin V/C-te râwn ni rawh se.
8.Khaw tinte'n vantlang rorelna (gram babha) a tam thei ang ber nei turin hma la rawh se.
9.V/C member thi an awmin sorkarin Rs. 1,00,000-in rál rawh se. -Vanglaini
Post a Comment