Thuhma:

‘NEVER ALONE’ - Bihchianna : Ziaktu - Lianthanga Hauhnar (LTa)He group a ka vawikhat post-na tur a ni a, thu leh hla thiam tak tak karah kei, he group a ‘silent reader’ ve mai in ka han post ve tur chu a zàmáwm duh khawp mai. Mahse tihtheih nei tlem hek i, thiam vang leh ṭha tih vang ni hauh lovin ṭul ka tihna in min hneh hrim a, chu chuan kei maha ziakmi muhil chu kaithovin a tawp lama ka ziahchhan ka sawi ang khuan tu emaw tan he thu tawite hi ka rawn thlasik mau puah-pui ve phawng mai a ni, a hun a thleng dawn tawh si a. Theih tawpa group dan leh dun zawm tum chungin hetiang hian ka rawn ziak ve e, dik tawk lo leh felhlel te a awm a, a chhiar tlak vak lo a nih pawhin ka phak tawk a ni tih hriain in lo hrethiam ve mai dawn nia aw...

A khuh hawnna:

Engineer ten enge an tih ṭhin pawh hre miah lo leh ngaihtuah pha ngai hauh lo thingtlang kilkhawr ve tak aṭanga seilian naupang khan, Engineer nih tumin mumangah pawh ka la hmuh phak loh ram chu panin Mizoram chu ka chhuahsan ve vang vang tak chu a nia leh! A ni tak a, thingzai bung a perek kilh bur a T.V a kan hmuh ṭhin sap ho tihdan anga benga nembet chunga “Ha-law” ti ve mai mai ṭhin, Mizoramah a takin mobile pawh a awm ring pha ngai lo khan mobile phone te chu kan khawih hnê lo chauh chu a ni ta si! A taka computer la hmu miah lo khan sap film changkang tak taka an hman ṭhin ang kha thing phelah a àwm ang thei ang berin meihawl hmangin computer keyboard lem leh monitor lem te kha kan ziak râng ṭhin a, chu khawl hmang chuan engkim a tihtheih a ni tih ring chung khan kan hmang ṭhin tak kha a nia! Tun ah chuan khang hunlaia kan ‘dream’, mobile phone leh laptop te chu mahni ngeiin kan lo nei ve ta reng mai chu a ni a, a mak in hnuk te pawh a ulh lo chauh ṭhin a nih hi.

Thing delh loh lung delh loh nafam chu lo ṭhang lian ve zelin kum te pawh a lo tam ve zel a. Khuanu ruat angin duhzawng te lo nei chho ve in, he zirna rûn ka kai hnu ah pawh hian ka thinlungah tu emaw chu a riak ve reng a. Chumi lai tak chuan alawm he hla, mawi leh ropui em em mai hi ka hriat a, ka rilru zawng zawng min hneh tak ni. He hla hi chù ka hmangaih tân chuan ka hlan a, thinlung leh tihtakzeta ngaithla chungin “Baby you are never Alone” ka ti hial ṭhin a ni.

Irish Malsawmna thu chu:

Zaithiam Victoria Shaw chuan a nulat vanglai hun tam tak chu Europe ramah show nei a vakkualin a hmang ṭhin a. Chung hun hlimawm leh nuam tak tak a hman thinna ram pakhat chu Ireland a ni. Nikhat chu Ireland a hmun pakhat a a awmlai chuan chanchinbu a thil inziak chu a chhiar mai mai a, chu chanchinbu a thu tawite, Irish malsawmna ṭawngkam tlar li lek chuan a mit a la ta hle mai. He thu tawi te hi tumahin khawvel pum deng chhuak khawp a hla mawi leh ril ‘Never Alone’  tih hla lo irhchhuahna tur a ni tih an la hre hauh awm love. He hla lar êm êm, Jim Brickman leh Lady Antebellum tena an sak lar tâk tlar hmasa pali leh heng thu tlar li te hi a ngial a ngan cuan inang chiah lo mahse an in hnaih hle a ni.

“May the angels protect you, troubles neglect you
And heaven accept you when it's time to go home
May you always have plenty, your glass never empty
And know in your belly, you're never alone”

Thlûk nei lo hla mawi:

Mahse Victoria Shaw chuan he thu hi hla ah a chantir nghal mai bik hauh lo. Chung thu tlar li lek te chu lehkha themah ziak thla in kum tam tak chu zaia a vahvelna ah a keng kual ta a. Hla a a chantir nghal mai loh chhan pawh tuman hla a siam an phurpui loh vang a ni. Chutia a kal velna ah pawh chuan a phawrhchhuak fova, a bik takin a zaipui leh hla a phhuahpui ṭhin Gary Burr bulah phei chuan a phawrh zing hle. Ni khat chu a ṭhianpa Gary Burr leh ṭhian dang pakhat, hla phhuahthiam leh zaithiam ni bawk Sarah Buxton nen chuan an pathumin an titi ho mai mai a, chutih lai chuan he thu tawite lehkhathema a ziah bawk hi a rawn phawrhchhuak leh ta a. He thu hi Sarah Buxton-in a hmuh chuan a duh ta em em a, tichuan an pathum chuan an ngaihtuahna te seng hovin he hla hi an thawhkhawm a, hla mawi takah an siam ta a ni.

“May your tears come from laughing, you find friends worth having
With every year passing, they mean more than gold
May you win and stay humble, smile more than grumble
And know when you stumble, you're never alone

Never alone, never alone
I'll be in every beat of your heart when you face the unknown
Wherever you fly this isn't goodbye
My love will follow you, stay with you, baby, you're never alone”

Khawvelin a lo hmelhriat ṭanna:

Victoria Shaw leh American zaithiam leh hlaphuahthiam, piano tum thiam em em mai bawk Jim Brickman hi ṭhian inhnaih deuh mai an ni a, hla te pawh lo phuah dunin an lo zaidun nual tawh bawk a. Zan khat chu Billboard a Victoria Shaw zai chu Jim-a hian a en ve a. Chumi ṭum tak chuan he hla “Never Alone” hi Victoria Shaw chuan a rawn sa a. Show a zawh veleh chuan Jim-a chu stage ah zuang chhovin “Awle, kha hla kha ka duh a ni. Kha hla kha ka record ngei tur a ni” a rawn ti hlawl mai a. Chhutihlai vel chuan Lady Antebellum pawh hi an indin chho mek a, tichuan Jim Brickman kaihhruaina hnuaiah he hla hi an record ta a ni.

Hla thiltithei chu:

He hla hi Irish malsawmna a nih angin kawng hrang hrangin a hman theih a, a phuahtu sawi dan chuan, “Tuipui râla sipai ralmu mêkte tan te, mitthi vuina hunserh ah te, zirna lama hlawhtlinna neih huna inthlahna hla atan te pawh. Irish malsawmna hian a huap zau hle a, vantlang zingah pawh he hla hi a hman theih a ni. Ka tan bik tak chuan, he hla hi ka sak apiangin, ka fa te ka ngaihtuah a, an rawn seilen hun tur te, hmun hrana min kalsan hun tur te, college an kal hun turte ka ngaihtuah ṭhin. Mahse he hla hi sawi tawh angin nangmah a khawihna apiang ah a hman theih a ni.” tiin.

“Well, I have to be honest as much as I wanted
I'm not gonna promise that cold winds won't blow
So when hard times have found you and your fears surround you
Wrap my love around you, you're never alone”

Min khawihna zawnah:

Tunah chuan he hla in min hneh êm êm hun aṭang khan kum hnih a lo liam ta. Khatih lai kha chuan kha hmeichhia khan ka rilru a luah takzet a, a thinlung leh rilru ka hmuh theih tlat loh vangin eng ang tak in nge min ngaih ve erawh ka hre lo. Mual hla kar dan ah awm mah ila phone hmangin kan inbe awl lo a, hlim takin hun ka hmang ve ṭhin. Mahse hun a lo kal a, inngaizawng ta lo chuan ṭhianṭha ah kan inchan a lo ṭul ta a, ṭhian hmangaihna dik takin ka en ta zawk a. Chu ka ṭhian kawmngeih em em leh hmangaih tak chuan naktuk 19th September, 2012 hian pasal duhawm tak mai a nei dawn a. He ka thu ziak hi hmu ve dawn lo mahse he hla hi a phuahtuin min khawihna apianga hman tur a tih angin, a kawppui nena hlim taka an awm theih nan, mual hla kar dan aṭang hian ka tihtheih tawk ah ngaiin ka duhsakna zawng zawng nen ka hlan e.

“May the angels protect you, troubles neglect you
And heaven accept you when it's time to go home
May you always have plenty, your glass never empty
And know in your belly, you're never alone”

‘NEVER ALONE’ - Bihchianna : Ziaktu - Lianthanga Hauhnar (LTa)

Post a comment

Powered by Blogger.