All India Radio News Aizawl
Prime Minister Pu Narendra Modi chuan vawiin khan kawlphetha MegaWatt 60 pe chhuak thei tur Tuirial Hydroelectric Power Project Aizawl Sipai Lammualah a hawng a, hemi rual hian sorkar laipui scheme North East Special Infrastructure Scheme (NESIS) hawn a nih thu a puang a, NLCPR hnuaiah he scheme hi kalpuiin state sawrkar te tum ve ngai lovin central chuan a zavaiin a tum dawn a ni.
Prime Minister chuan Tuirial HEP hawn a ni ta chu Mizoram tan mel lung pawimawh tak a ni a ti a. North East hmasawnna tur a tan Central Sorkar chuan theihtawp chhuahin, Scheme leh Project a duan lo thuanawp ta te chu tunah hian tihhlawhtlin chhoh mek zel a ni a ti a. Tuirial HEP hawn anih tak avang hian Mizoram chu hmarchhak bialah Sikkim leh Tripura dawta power a intodelh thei state 3-na a ni ta a, Mizoram chuan power siamchhuah theihna hmun tha tak a neih avangin state dang te hnena hralhchhuak thei turin theihna a nei a. NE State ten ram dang thlenga power an pek chhuah theih nan Sorkarin cheng Vaibelchhe 10,000 hemi atan hian a dah tih a sawi bawk.
(Audio)
Pu Modi chuan nimin mai khan Central Sector Scheme thar pawm a nih thu a sawi bawk a, he Northeast Central Infrastructure scheme hnuaia Project hrang hrang te chu State Sorkar te nena inrawn tawnna atanga duan a nih thu a sawi a . He Scheme hnuaia Hmarchhak biala sawrkar laipui hnathawh Non Lapsable Central Pool of Resources (NLCPR) ah state sawrkar te tum ve ngai lovin central chuan a zaa za a tum tawh dawn a. Hemi atan hian Kum 3 chhungin NE State tan cheng Vaibelchhe 5300 dah a ni dawn tih a sawi bawk a. Hmarchhak bial inkalpawhna kawngpui cheithat hna pawh thawh a ni dawn tih sawiin state khawpui te chu rel lian chi a kalpawh tir vek tum anih thu a sawi bawk.
Mizoram chu India tan South East Asia sumdawnpuina tur atan kawtchhuah remchang ber a ni a, Mizoram in a hlawkpuina tur hi a liantham takzet a ni a ti.
Pu Modi-a chuan India in Bilateral project a kalpui mek te chu zawh tep an ni tawh a; chung zingah chuan Mizoram kaihhnawih Kaladan Multi Modal Transport Transit Project, Rih-Tedim Road Project leh a dang te chu Mizoram tan chauh ni lo Hmarchhak bial hmasawnna atan hmasawnna liantham rawn thlen tur te an ni a ti a.
Prime Minister Pu Narendra Modi chuan Mizoram chhunga mau te hmang tangkai turin tunhma in Forest dan khirh tak vanga a hralhna lamah harsatna awm thin chu tunah hian siamthat a nih tawh thu a sawi a. Mizoram chhunga mau te chu a huanneitute tan permit dil kher ngai tawh lovin an hralh thei a, hmanrua ah siam in sum ah an chan tir thei tawh dawn a ni a ti.
Mizoram chu infiamna khawvelah an chhuanawm tih sawiin Mizo football khelthiam te leh infiammite an hming hmerh a lam chhuak in an hlawhtlinna a chhuan thu a sawi a. Aizawl Football Club hlawhtlinna ropui a tih thu sawiin Mizoram in football a thiamna chu khawvel mite hriata 'Global Identity' siam sak tur khawp in a sang a ti a; Mizoram in football thiltihtheihna nelawm leh duhawm 'football's soft power' a nei tih sawiin Mizoram mipui zawng zawng Krismas leh Kumthar hlim tak a hmang tur a duhsakna a hlan nghal a ni.
He hunah hian Mizoram Chief Minister Pu Lal Thanhawla chuan Mizoram mipui aiawhin Prime Minister Pu Narendra Modi chu lo lawmin Mizoram in kawng hrang hrangah midangte umphak tura theihtawp a chhuah thu te, India rama state ralmuangber a nih theih chhan te, state faiber pawl a nihna te leh boruak thianghlim tak a la awm thu te bakah Central puihna in chak leh zuala Mizoram chuan ke a pen theih thu leh theihna sang tak Mizoram in a neih te a tarlang a. Mizoram dinhmun chiang zawka rawn hmu turin Prime Minister Pu Narendra Modi chu zan 2 tal riaka rawn zin leh ngei turin a sawm a ni.
Tuirial HEP hawnnaah hian Chief Minister bakah governor Lt. General Nirbhay Sharma, Union minister of state for power R. K. Singh, union minister of state for the development of north easrtern region Jitendra Singh, leh state sorkar hottute an tel a ni.
Post a Comment