Mizoram Synod Inkhawmpui vawi 94-na, Bungkawn kohhran biak-ina neih chu nizan khan a ṭiak. Nimin chawhmaa inkhawmah pastor atan mi 25 nemnghetin, Pro pastor atan mi 16 dahngheh an ni a, ṭum khata pastor nemngheh tam ber ṭum a ni.
Synod Inkhawmpuiah hian Inrinni chhun khan rorel inkhawm neih leh a ni a, zawh hman a nih loh avangin Inrinni zan inkhawm bakah chhunzawm niin, zan dar 10:30 velah an zo thei a ni. Inrinnia an thurel zingah, kum 2018 Assembly inthlan pualin ram pum huapa ṭawngṭai rual leh Mizoramah zu leh ruihhlo hluar lutuk a reh theih nan ṭawngṭai rual a tel a; SEC bawhzui turin an dah.
Moderator kal chhuak Rev. Lalzuithanga chuan nizan inkhawmah thuchah a sawi a, "Nakkum inthlanpui kan neih turah hian kohhran mite chuan kan awmna party duh dan aia Pathian duh dan ngaichâng thei turin, ngaihtuahna fím tak kan hman a pawimawh. Party ruihchilh vanga kohhrana rawngbawlpuite leh chhungkhat lainate thlenga en hrannate hi kan bànsan loh chuan, he ram hi a ding chhuak lo ang," a ti a; India ram, Hindu rama siam tumtute beihna hriatthiam a ṭul thu a sawi.
Rev. Lalzuithanga chuan, Mizoram chu India rama HIV/AIDS vei percentage sanna bera puan a nih tawh thu sawiin, "HIV/AIDS vei sanna ber (1.19%) kan ni ta hi kohhrante'n en liam mai loin, thawh tur kan ngahzia kan hriat phah a pawimawh a ni," a ti. NACO Sentinel Surveillance 2016-17-in a tarlan danin, HIV/AIDS vei zat chu Mizoramah 1.19%, Nagaland-ah 0.82% leh Meghalaya-ah 0.56% a nih thu a sawi a ni.
Tun ṭum Synod inkhawmpui-ah hian palai ni sa 1,222 leh palai thlan 892 bakah, chhimtu mi 15 an awm a, rorel palai zawng zawng chu mi 2,129 an ni. Kum 2018-a Synod Inkhawmpui chu Electric Veng Pastor Bialin Electric Veng Kohhranah an thleng ang.
Report-a a lan danin, Mizoram Synod hnuaiah hian presbytery 49, pastor bial 288, tualchhung kohhran 1,097, member 5,94,457 leh dan zawh kim 4,13,209 an awm a; pawl dang aṭanga lut mi 4,100 leh pawl danga pakai mi 2,173 an awm. Kum kal ta chhungin nau piang 8,675 leh mitthi 3,660 an awm a ni.
Mizoram Synod hnuaiah thawktu - Pastoral-ah mi 934, Mission Board hnuaiah mi 2,663 awmin, thawktu zawng zawng chu mi 3,597 an ni a; Synod Mission Board-in Mission Field 17 neiin, kum kal ta chhungin ring thar 7,084 an nei. Kum kalta chhungin chhawmdawlna, Rs. 25,57,000 pekchhuah a ni a; kum 2016-17 chhunga thilpekin kum 2015-16 chhunga thilpek a khûmna chu Rs. 17,53,40,841 a ni. -Vanglaini
Post a Comment