TUIRIAL HEP MNF IN AN SAWPCHHIAT VEK TAWH PRIME MINISTER MEUHIN A HAWN CHAK KHAWPA CONGRESS SAWRKARIN HAWN THEIHA A PEIH TA HI A LAWMAWM TAKZET : Lal Thanhawla Chief Minister

Zosang Liana


Aizawl,16/12/17: Kum 2017 atan Congress pisapui Bhavan khar inkhawm chu Congress Bhavan Golden Hall-ah nimin ni 15 December 2017 khan neih a ni. Pu R. Lalzirliana Vice President MPCC leh Home Minister ni bawkin inkhawm a kaihruai a, Rev. Thangliansanga, Principal ATI UPC (Mz) in hunserh a hmangin Chief Minister Pu Lal Thanhawla, President MPCC in thuchah a sawi a. Congress zaimi ten mawi takin hun tawpah hla an rem. Congress Bhavan hi January 8, 2018-ah hawn leh a ni ang.

Pu Lal Thanhawla Chief Minister chuan Pathian thu hriltuten an sawifo thin hun hnuhnung hi a ni tawh mai dawn em tihte pawh ngaituahna a awm thin tiin tunlai America ramin Jerusalem chungchanga ngaihdan a sawite pawh hi Jentel-te nikin hun a ni tawh mai dawn em tih te pawh ngaihdan a awm thei a ni, a ti. Pu Hawla chuan keima mimal ngaihdanah chuan Pathian nung hian khawvel aṭang hian sual hi lak bo a tum lo, khawvel tawp thleng pawhin sual hi chu a awm dawn a, mahse chutiang titute zinga kan tel lohna turin khawvel chhandamtu Pathianin min pe a, chu mi champha chu kan thleng leh tawh dawn a. Pathian kaihruaina duhawm tak kumtluanin kan dawng a, kan phak tawk theuhah he hunpui Krismas lo thleng turah hian mite tan malsawnna nih tum theuh ang u, a ti.

Pu Lal Thanhawla chuan sawrkar hmasain an tihchhiat lailet der tawh Tuirial HEP MW 60 pechhuak thei tur, ṭangkai taka Mizoramin kan chhawr theih tur, MNF sawrkarin a sawpchhiat vek tawh hawn theih a nih takah hian Prime Minister meuh pawhin hawn a chak avangin a rawn kal phah dawn a, hengte hi in sawrkar hnathawh ropui tak, state dang pawha thleng zen zen lo a ni a, a ti a. Kum 1998 inthlan khan congress sorkar tla lo se Mizoramin power megawatt 270 kan nei tawh ang a, MNF sorkar lo se chuan mizoramin tun dinhmuna kawlphetha a mamawh megawatt 100 vel bakah hralh tur megawatt 170 a neih tur thu a sawi.
Hunserh hmangtu Rev. Thangliansanga chuan Pathian policy ah chuan sualna hmanrua a awm loh avanga sual lo hi Lalpa zawn a ni lo. Zu bel bulah pawh in lo thei hi an duhawm zawk a ni, a ti a. Kohhran chuan thlarau nun kan veng ang, ram rorelnaa Kohhran inrawlh thuk lutuk pawh hi a tha lo, inluan fin lutuk loh hi a tha zawk awm e, a ti. Nula thianghlim Mari’in a pasal hual Josepha kalsan huam a, a pasal hual fa ni lo Isua a pai ngam ang khan keini pawhin Krismas hlimawm tak kan hman theih nan khawvel a kan ngaihnat ber, kan thakhlelh ber leh nuam kan tih ber thinte aiin Lal Isua pai zawk ila, Isua hming avanga engkim chan huamte hi Pathianin a pek belh zawk thin tiin Krismas thuchah a sawi a ni.

Post a Comment

Powered by Blogger.