Zoram Peoples' Movement (ZPM) chuan December 1, 2017 khan Hnahthial Bazar-ah vantlang inkhawm an nei a; SPM general secretary K Sapdanga'n kaihruaiin, thu sawitu PL Liandinga chuan, ṭangrual pawl an nih avangin mi zawng zawng huapzo sorkar din an tum thu a sawi.
PL Liandinga chuan, Mizoramah political party pahnih, Congress leh MNF sorkarna hnuaiah sem policy kalpui ni mah se, mipuiin hma an sawnpui lo niin a sawi a, "A chhan pawh, ram changkangah semin bul an ṭan ngai lo, bul an ṭan lo mai ni loin, mipuiah a sum faiin an sem ngai lo. Kan ramah chuan vote hmuh nante pawisa in dawng ang an ti a, pawisa nen kan intilungawi chhawm zel a ni," a ti.
Zoram Peoples' Movement (ZPM) -in mi zawng zawng huap sorkar din tum
ZPM chuan sum an sem ve dawn lo tih sawiin PL Liandinga chuan, "Inthlan dawnah pawisa kan sem dawn lo a, inthlan zawhah pawh mimal hnenah a lawng ringawta pawisa sem kan tum lo. Mi zawng zawng ban phak hmasawnna erawh chu phawrh chhuah kan tum. Ṭanrual pawl kan nih avangin mi zawng zawng huapzo sorkar din kan tum," a ti a; party dang mi pawh an en hrang dawn lo tih sawiin, changkanna awm si loa sum sem chu tihtawp a ngaih thu sawiin, sum sem ve lo tur ZPM bêl turin mipui a sáwm a ni.
ZNP president Lalduhoma chuan, Congress party chu khawvela party corrupt ber palina an niin a sawi a, "Kum 33 kal ta kha thlir kîr ila, President's Rules-ah rei lo tê kan awm zawk tih loh chu Congress leh MNF party kaihhruaina hnuaiah kan la kûn ngat ngat a, mah se, hmasawnna min thlen chu heti zawng hi a ni," a ti. -Vanglaini
Post a Comment