MNF ṭhalai, MNYF headquarters chuan December 2, Inrinni khan kumina a tawpna atan Mamitah 'Vangpui Fehchhuah' beihpui an thlak leh a; Charkawn leh Field Vengah vantlang inkhawm buatsaihin, MNYF president Lalrinawma, MLA leh hruaitu dangte'n thu an sawi.
Lalrinawma chuan, MNF a sorkar chuan market information system mumal tak neih tum a nih thu sawiin, "Mipuite'n kan thil thar chhuahte hralhna tur rate bituk dan kan hre lo a, an rawn zawnna rate ang angin kan lo sakuh ser nghah tawp mai a ni. MNF kan sorkar chuan SEDP-in a tum angin market information system changtlung tak kalpui kan tum," a ti a; Silchar, Siliguri, Hailakandi, Bagha-a thlai rate Mizo mipuiin an hriat theih nan media hmangin an puanzar ṭhin dawn thu a sawi.
MNYF President chuan, Congress sorkarin NLUP hmanga hma an lakna zawng zawng zinga 90% vel chu lo neih leh a kaihhnawih (agriculture) thil a nih thu sawiin, "Kum 2010-11 vela kan state thar chhuah pumpui, state GSDP-a a lan danin, agriculture kaihhnawih 20% a ni a, NLUP kum riat an kalpui hnuah 18%-ah a tlahniam leh tawh zawk a ni," a ti. -Vanglaini
Post a Comment