Synod Revival Commitee buatsaihin December 2, Inrinni khan Mizoram hmun hrang hrangah ram pum huap ṭawngṭai beihpui thlak a ni a; mi ṭhahnem tak telin, ram tan an ṭawngṭai.
Ṭawngṭai beihpui thlak hi Aizawlah chuan chawhma dar 11-ah Mizo High School Field-ah neih a ni a, Synod executive secretary (senior) Rev. Lalramliana Pachuau-in kaihruaiin, Synod moderator Rev. Lalzuithanga'n thuchah a sawi.
Rev. Lalzuithanga chuan, Mizoram chu sualin a kâng mek tih sawiin, tuna Mizoramin a mamawh ber chu Pathian a nih thu a sawi a; kohhran mipuite chu Mizoram a dam leh theih nan an rinna tichak a, intihuai deuh deuh turin a chah.
Synod Moderator chuan, Mizorama political party hrang hrangin party politics an buaipui dan ngaihtuahin, ramin hmasawnna tak tak a neih theih a beisei loh thu leh mipuiin party politics an ruihchilh nasat avangin thil dik lo nia lang pawh an ṭan lam tih a nih chuan dikah an pawm tawh mai ṭhin niin a sawi a; chutiang ngaihdan chu bànsan a, party ṭan lam nei lo tur leh party-ah an awm a nih pawhin, thil dik leh dik lo thliar thiam turin a fuih a ni.
Ṭawngṭainaah hian lawmthu sawina te, Mizoram chu Pathian duh zawnga luah leh enkawl zel a nih theih nan te, rethei leh hausa inkar zau zel vanga harsatna awm sutkian a nih theih nan te, kum 2018-a Mizoram inthlanpui awm turah party ruihchilhna bànsana Pathian pawmpui tlak inthlanna thianghlim leh felfai a awm theih nan te, zu leh ruihhlo zalen taka zawrh leh lak luh tihtawp a nih theih nan te, HIV/AIDS vanga natna leh mualphona a kian theih nan te, Mizorama cheng hnam hrang hrangte inlungrual taka an chenho theih nan leh chi inthliarna a reh theih nan te, remna leh muanna dik a awm theih nante leh thupui dangte hmangin an ṭawngṭai a ni.
Post a Comment