Aizawl FC chuan zanin dar 7:00 hian Mizo club zinga AFC Champions League playoff khel hmasa ber ni turin Iran club Zob Ahan Esfahan FC an hmachhawn ang.

India Aiawh

India hian Asia khawmualmualpuia football inelna sang ber AFC Champions League playoff khelh turin team pakhat chiah an thawh thei a, Mizo club hi I League champion an nih vanga tel an ni.

aizawl fc squad asian championshipAFC ranking hmangin inelna tel tur hi thlan a ni a, India hi ranking-a an hniam avangin an hnuaia club ten inelna an hmachhawn ve nghal nghawt thei lo. Champions League group stage pawh hi India ram aṭangin thleng pha an la awm lo a, tuna Mizo club khelh tur playoff khel pha pawh an la awm lo.

Ramchhunga sulhnu nei ṭha Bengaluru FC leh Mohun Bagan te pawhin Preliminary Round 2 bak an la khel lo. India-in tun hnaia AFC ranking-a hma a sawn avangin Mizo club hian playoff aṭangin bul an ṭan dawn a, Indian club zinga playoff khel thei hmasa ber an  ni.

Kum 2016 khan Mohun Bagan chuan Preliminary Round 2-ah Chinese club Shandong Luneng Taishan lakah goal ruk ngawt an chhuah a, goal an khung ve lo. Mizo club leh AFC Champions League inkarah hian match khat lek a awm nachungin Asia khawmualpuia inelna sang ber khel pha tura beisei an ni lo. Chutihrualin an chak ta lo a nih pawhin AFC Cup-ah an inlan dawn a, he inelnaah hian Federation Cup champion Bengaluru FC pawh an inlan ang.

Iran club nen

Playoff hi match khat chauh khelh tur a ni a, AFC ranking-a sang zawk khelmuala khelh tur a ni. Aizawl FC khingpui tur Zob Ahan Esfahan hi Persian Gulf Pro League-ah season liam ta khan palina an ni pha chauh a, chutihrualin Iran leh India inhlat zia hriat a ṭha.

Iran hi chuan kumina neih tur FIFA World Cup-ah pawh an inlan dawn a, Asia rama tling hmasa ber an ni. Chuvangin Iran palina hi India ram champion aiin an la sang zawk daih a, an mahni muala khel tur an nih bawk avangin an dinhmun a ṭha hle.

Aizawl FC-in an match hnuhnung pathumah chak hmel an la hmuh loh laiin Zob Ahan Esfahan erawhin match hnuhnung paliah hnehna an chang vek a, an league-ah pathumna an ni mek bawk.

Zinkawng hautak

Aizawl FC hian Zirtawpni khan Mizoram chhuahsan tawh mah se visa buaipuia Delhi-ah zan hnih an riah avangin nimin zing khan inelna neihna tur hmun an thleng chauh. Champions League-ah foreigner pali chauh ziahluh theih a ni a, Mizo club-in an ziahluh zinga mi Kareem Omolaja chu a inhliam avangin a thlak nan Leonce Dodoz telh an tum a, amaherawhchu visa a fel hman loh avangin foreigner pathum chiah an nei dawn.

Portuguese coach Paulo Meneses chuan, "Dodoz kan chhawr theih loh ai mahin zin kawnga kan chauhna hi kan tuar ang. Khua a vawt em em bawk a, amaherawhchu kan harsatna sut kian dan tur kan zawn a ṭul a ni. Mizo mipui tan kan khel dawn a, India ram aiawh kan ni tih kan inhriat a ṭha a ni," tiin Vanglaini a hrilh.

Mizo club-in Iran an thlen hian khaw vawt zawng chu -3 degree celsius a ni a, hetiang anga khawvawt la tawng lo Mizo tlangval tan khelh a awlsam dawn lo a, chutihrualin zanin hian eng result pawh nei se an thlen chin hi a sang hle.

AFC Squad

Goalkeepers (2) : Avilash Paul, Lalawmpuia. 

Defenders (6) : Masih Saighani, R. Laldinliana, C. Lalrosanga, Lalramhmunmawia (Tea), Lalrozama, Hmingthanmawia. 

Midfielders (7) : Alfred Kemah Jarayan, Andrei Ionescu, S. Malsawmtluanga, David Lalrinmuana, K. Lalṭhathanga (Puitea), Sena Fanai, Rochharzela, Albert Zohmingmawia.

Forward (3) : William Lalnunfela, Jonathan Lalrawngbawla, Lalkhawpuimawia

Source: Vanglaini

Post a comment

Powered by Blogger.