MIZO FOOTBALLER JERRY MAWIHMINGTHANGA CHE THA

Jerry-a mawi zanah Jamshedpur chak

Indian Super League-a hming langsar zingah Mizo an tel zel - Pathianni zan khan Jamshedpur FC chuan an mikhualna ramah ATK chu 1-0 in an hneh a, Mizo rawlthar Jerry Mawihmingthanga chu Emerging Player of the Match-ah thlan a ni.

Coach lailawk Ashley Westwood hnuaia khel ATK-in hnehna chan an mamawh tih inhre mah se an mamawh goal an khung thei lo a, team pahnih an innawr tawn zak zak hnu minute 66-naah JFC-in penalty an hlawh chhuak.

Penalty pet tur hian Trindade Goncalves a pen chhuak a, Brazilian forward hian ama penalty hlawhchhuah hi an hmahruaina goal ni turin a khung - ATK lamin a chhanletna an nei thei lo a, a zawna a vawi thum nan champion lai hi an tlawm ta. Beisei phak lo coach Teddy Sheringham bantu team hian semifinal luh beiseina an nei chau ta hle.

Pathianni zan FC Goa leh Mumbai City inkhelah goal sarih a lut a, mikhual team Mumbai chuan 4-3 in hnehna an chang. Goan club tan Ferran Corominas (goal hnih) leh Manuel Lanzarote ten goal an khung laiin Mumbai tan Everton Santos, Achille Emana, Thiago Santos leh Balwant Singh ten goal khat ṭheuh an khung a, hnehna an chang.

Goa tan minute 48-naa Seriton Fernandes hnawhchhuah a nih avanga player 10-a an khel chu chak loh chhuanlam tling a ni - Goan tlangval hnawhchhuah a nih hma hian 2-1 in hma an hruai. -Vanglaini