AIZAWL FC LEH MOHUN BAGAN INTUM DAWN

Mohun Bagan hmaah Aizawl FC

I League champion nawn tum Aizawl FC chuan Mohun Bagan

hmachhawn turin January 7, Pathianni tlai dar 2:00 hian Salt Lake Stadium an lenglut dawn a, Star Sports 2-ah a en theih ang.

Aizawl FC hian match ngaah point 10 an hmu a, Mariners hian hetiang zat bawk point hmu hian match hnihin an khel tam thung. Mizo club hian Bagan chhuh sakin I League nomawi an kawl mek a, Kolkata club hian phuba lak ngei an duh ang.

Bagan buai lai!

Mohun Bagan nena inhmeh tawh veteran coach Sanjoy Sen chuan result ṭha an neih loh avangin Chennai City an hneh loh zawhah a ban thu a puang a, Mariners hian a thlak nan assistant coach Sankarlal Chakraborty an thlang. Bagan player hlui Shankarlal hian July 2014 aṭang khan assistant coach hna hi a chelh tawh a, club hrechiangtu ni mah se Kolkata club hi champion tum an nih avangin hmabak a hautak nghal ang.

Mariners hian player 10-a khel Chennai City an hneh loh hma hian Shillong Lajong, Neroca leh Indian Arrows te nen an inhnehtawk a, match li chhung chak hmel hmu tawh lo an ni. Amaherawhchu, Bagan hian an mualah Aizawl FC hi ṭum hnih mikhual tawhin an hneh ve ve a, Mizo club tan point hmuh hrim hrim a harsa ang.

Bagan hian player pawh an nei ṭha a, tlarhmaah I League tawnhriat nei tawh pahnih Aser Pierrick Dipanda leh Ansumana Kromah te an kawptir thei a, tlarhnungah Aizawl FC champion puitu Eze Kingsley bakah Mizo tlangval Ricky Lallawmawma te an awm bawk. Mizo club tana chanchin hriat nuam erawh Bagan thiampuipa Sony Norde leh midfield tichaktu Yuta Kinowaki te hliam vangin a la inlan thei dawn lo. Neroca an khelh ṭuma inhliam Haitian forward Norde hi Chennai City nen squad-ah a awm lo a, he inkhel hi tun season-a an chak lohna hmasa ber a ni.

AFC phur lai

Aizawl FC-in an hmachhawn laia league hmahruaitu Minerva Punjab an hneh hnuah khualmualah Gokulam Kerala an hneh a, tun hi Mizo club phur vanglai a nih avangin beseina sang tak nen Salt Lake an lut ang.

Mizo club tan Andrei Ionescu-a'n inkhel bul a ṭan hnuah an goal nawr a na sawt a, Romanian midfielder Andrei leh David Lalrinmuana te chu midfield-ah an inkawp rem hle. Tlarhnung pawh MPL6 best defender R. Laldinliana chhawr a nih hnuah a phui sawt a, Aizawl FC coach Paulo Meneses-a'n a player neih dan a hre chiang chho a, a rem fuh chho ṭanah a ngaih theih.

Amaherawhchu, AFC winger H. Lalmuankima'n ISL club FC Goa a pan a, Bawngkawn tlangval MK-a hi I League-ah a inlan dawn tawh lo. AFC boss Paulo chuan, "MK-a thlak hi a harsa dawn a, thlak dan erawh kan zawn ṭul dawn a ni. Gokulam nena tel lo Albert leh Fela ten Bagan hmachhawn turin squad an rawn zawm tawh a, anni bakah player dangte pawhin theihtawp an chhuah vek a ṭul dawn a ni," tiin I League match nga la khel kim vek MK-a thlak a har tur thu a sawi.

Hetihlai hian Albert Zohmingmawia leh Lalruatfela Zote hi MPL-ah pawh player ṭha bik an ni a, an theihna anga an khel thei a nih chuan MK-a awm loh hriat loa thlak thei tur a ni a. Mizo club-in player inhliam an nei lo a, Portuguese coach Paulo-a'n duh thlan tur player a nei dawn tihna a ni.

AFC coach Paulo chuan, "Ka player neih ang te hman thiam hi ka tih tur a ni a, Mohun Bagan hneh thei tur player kan nei a ni. Chutihrualin team ṭha an nih avangin kan fimkhur dawn a, Alfred-a pawhin inkhel bul a ṭan ang," tiin Vanglaini a hrilh.

Season liam ta I League best player Alfred Kemah Jaryan hi Gokulam nen bench-ah dah a ni a, Bagan nen erawh goal venhim lam a ngai pawimawh dawn tih a hriat theih. Foreigner panga chiah playing eleven-ah a dah theih a, Alfred a inlan dawn avangin Yugo Kobayashi a awl a rinawm. AFC forward thar Khawpuimawia chu squad-ah a la tel loh avangin Japanese forward Yugo hi a awl a nih chuan William Lalnunfela'n inkhel bul a ṭan ang.

Portuguese coach Paulo chuan, "East Bengal nen kan khelh ṭumin Kolkata-a Mizo mipuiin ṭha takin min ṭawiawm a, tun ṭumah pawh hian kan beisei nawn leh a. Mizoram lamah pawh kan inkhel en turin ka sawm a, Aizawl FC hi Mizo football hmel a nih avangin theihtawp kan chhuah ang," tiin a sawi.