Champhai District Electoral Roll TLANGZARHELECTORAL ROLL TLANGZARH

Vawiin khan kum 2017-a Champhai District Electoral Roll chu Pu Vanlalngaihsaka, Champhai DC leh District Election Officer ni bawk chuan a tlangzarh.

Pu Vanlalngaihsaka, DEO chuan thu sawiin nikum September thlaa Draft Roll tlangzarh a nih hnuah Final Roll tlangzarh a ni thei chu a lawmawm hle a ni, a ti a, electoral roll peihfel a nih theihna tura thawktute inpekna te, political party leh tlawmngai pawlte tawiawmna leh thlawpnaah lawmthu a sawi. DEO chuan political party te chu election kaihhnawih thil hrang hrangah a pawimawh ber te an nih angin sorkarin hetiang lam thil tih a neihte ngai pawimawh thin turin a chah bawk a ni.


He hunah hian Pu Lalremruata Kullai, EO chuan nikum chhunga Electoral roll ennawn dan tlangpui report a pe a. Kum danga tih thin angin khaw hrang hrangah hearing neih a ni a. Hemi bakah hian Election Commission of India ruahman angin BLO te chu in tinah lutin electoral roll-a la chuang lo leh siamthat ngaite an dap thu a sawi a, February thla atang hian siamthat ngaite siamthat a nih tur thu a sawi ve bawk.

Electoral roll tlangzarh taka a lan danin Champhai District-ah hian voter nei mi 82851 an awm a. Heng zinga 41128 chu mipa niin 41723 chu hmeichhia an ni a, vote nei thar hi mi 2054 awmin nikum aiin vote nei hi Champhai district-ah 1596 in an tam zawk a, an punna hi 1.9% a ni.


Assembly Constituency 5 zingah 23 Champhai North AC chu vote nei tamna ber niin 18228 an awm a, 25 East Tuipui chu a tlemna ber niin vote nei 14696 an awm a ni. Nikum chhunga electoral roll-a lut thar tamna ber chu 24 Champhai South niin lut thar hi 404 an awm a, vote nei sa atanga chhutin hei hi za zela 2.3 a ni. Champhai district-ah hian vote nei zingah mipa aiin hmeichhia an tam zawk a, sex ratio hi 1017 niin Champhai North leh South-ah te hian mipa aiin hmeichhe voters an tam zawk a ni. Polling station-a voters tamna ber chu Champhai South AC-a 24/22 Zokhawthar a ni a, voters 1268 an awm a. Polling station-a voters tlemna ber chu Lengteng A/C-a 21.24 Taitawkawn niin voters 53 an awm a ni. Electoral roll tihchhuah tharah hian kum 2000 hnu lama piang mi 11 te chu thun luh an ni bawk.

Electoral roll-a thun tharte voters ID hi tun thla ni 25-a hman tur National Voters' Day hian sem chhuah a ni ang. Electoral roll tlangzarh tak hi vawiin khan political party te hnenah sem chhuah nghal a ni bawk.-DIPR

Post a comment

Powered by Blogger.