CHHIATNI KAIHHRUAINA
1. Mitthi In lam singsak :
(a) Mipui punkhawmna atan kan In leh lo singsak a ngai thin a. Hetiangah hian thenrual thate'n tlawmngaih chhuah zel ila. Amaherawhchu, hmanhmawh lutuka tih loh nise a tha a, siamthat leh har tur phei chuan tihdanglam loh ni thei se.
(b) In chhunga thil tar, mipui hmuh atana ngaihmawh chi a awm a nih chuan dah bo mai ila.
(c) Mitthi an awma, thingpui lum hi In lam singsak felah tan nise. Thingpui bawlhlo hi mitthi chhungte leh Branch hruaitute inberawn emawa a fel thei ang bera lak thin nise.
(d) Chhiatnia bungrua kan lak thin hi sulhnu chhui a fel zawk theih nan uluk taka chhinchhiah thin nise.
(e) Mitthi chanchin ziahna tur board neih theuh nise. Chu board-ah chuan hetiang hian ziak ni se.
KAN THEN TAK
Hming : ............................................. Kum ..........
Thih hun : .............................................
Thih chhan : .............................................
Vui hun : .............................................
Vui tu : .............................................
Kohhran : .............................................
2. Dar vuak : Mitthi dar vuak hi vengchhungah mitthi an awm tih vengchhung mipuite hriattirna a ni a. Mitthi an awmin mi zawng zawng hriat theih tura dar vuak nise a tha. Aurinna-a puang thinte tan dar vuak kher a ngai lo thei ang.
3. Puan zar : Chhiat tawk an awm tih hriattheih nan chhiatniah Branch tam takin puan dum an zar thin a, hei hi a tha hle. Puan zar len zawng chu Branch thu nise.
4. Zualko : Zualko kal chungchangah hengte hi kan ngaihtuah a tha :
(a) Laina hnai leh tuarpuitu tak takte hnenah chauh zualko intirh thin nise. Hmelhriat leh khawchhuak nazawng lam khawm tura zualko intirh vak hi chin loh a tha.
(b) Telephone hman theihna hmunah Telephone-a hrilh tawh te hnenah a hrana zualko intirh leh hi tul tawh lova ngaih nise.
(c) Lirthei hmanga zualko kan kal thin hi a awlsamin a tha a. Amaherawh chu lirthei neite tlawmngaihna rinpui bera neih erawh chu tih loh nise.
(d) Mi thenkhatin address hriat chian lohte hnenah zualko tirh an tum thin hi a kawngkal lo hle.
(e) Mi thenkhatin chhiatni thatnia hman tur laina hnai leh thenrual thate hming leh address ziaka an lo vawng thlap thin hi thil chin tlak tak a ni.
(f) Zualko kal hi tlangval mawhphurhna a ni.
(g) Mitthi chhungten hrilh awm an tihte lo hrilh chhawng mai tura laina hnaite kutah zualko kalte'n va thlen thin nise.
(h) A theih ang anga zualko lo tanpui hi mitinin kan mawhphurhna a ni a, YMA member te phei chuan mawh kan phur lehzual.
(i) Zualko kalte'n an mi kohte nghakin, an thawmhnaw te ah sakin an ruala In thlen hi chin dan mawi tak a ni. Zualko kalte'n an mi kohte chanchin hi thlen leh nachang hriat tur a ni.
(j) Tun hma chuan lehlanga kal phak chinah chauh zualko kan intir thin a, Lirthei a lo awlsam tak avangin lam hla zawkah pawh kan intir ta zel a, lehlanga kal phakna piah lamah chuan thisen zawmpui tak takte chauh koh nise. A lam tur bik motor kan tir thei a nih loh chuan lamhla zawka mite innghah hi ching lo ila.
(k) Hmun khatah tam tak intir lo ila, khawpuiah phei chuan pahnih pawhin veng tam tak a kawp theih a ni.
(l) Zualko form siamin hetiang hian zualko intir ila :
To,
.....................................................
..................................................... khua/veng
Chanchin lawmawm lo tak, chhiat tawh thu kan han hriattir a che. A hnuaia kan ziak lante hi lo hrilh la, hemi baka hrilh awm i tihte chu i lo hrilh dawn nia.
MITTHI CHANCHIN
Hming : ......................................................................
Pa/Nu/Nupui/Pasal hming : ..........................................
Thih hun : ....................................................................
Thih chhan : .................................................................
Vui hun : ......................................................................
Mitthi chhungkaw dang hming :
1. ...............................................................................
2. ...............................................................................
3. ...............................................................................
HRILH TUR TE
Sl/No. Hming Hnathawh Inlaichinna Tuldang
1. ................ ................ .................... .................
2. ................ ................ .................... .................
3. ................ ................ .................... .................
( )................................................... veng
(m) Khualkhuaa zualko kal turin emaw, kal kher lova lehkha thawn nan lirthei hman kan duh changin motor khalhtute'n zualko kan ni tih an hriat theih nan zualko Flag puan dum hlang tar/ken thin nise a tha. Hei hi Zoram Drivers Union (ZDU) te nena kan rawngbawlhona a ni e.
5. Ruang tlaivarpui :
(a) Ruang tlaivarpui hi thalaite mawhphurhna a ni a, hetiang huna lan loh hi thil zahthlak tak a ni.
(b) Ruang tlaivarpuinaa inchhunga thutna a awl reng laia pawna awm hi a mawi lova, nula tan phei chuan a mawi lo lehzual.
(c) Khawvar veleh haw mai tur a ni lova. Nu leh pa hmel a lan tam hma chuan haw loh a tha ber a, tlaivar thlaktu nu leh pa pawhin tlaivarte hmakhawngai taka kal hma pawh a tha khawp mai. Nu leh pa hian nula leh tlangval tlaivar thlak hi kan mawhphurhna a ni a, kan taima tawk lo hle, tan la ila.
(d) Ruang tlaivarpuinaa thingpui leh tul dang awm theite Branch tinin tha an tih angin mahni Branch theuhvah kalpui nise.
(e) Hmun hrana thi, ruang thleng mai lo tur tih hriatsa chu khawtlangin tlaivara nghah loh nise.
6. Thil khawn :
Mitthi an awma thingfak hnih leh buhfai dut no khat (thing tuah lote chu thingfak aiah Rs 2/-) kan khawn thin hi ram lo thang zelah remchan lohnate awm thei a ni a. Chuvangin Branch tinin mahni veng mil ang zelin mahni veng chhungah mitthi chhungte tanpuina hi rel ni mai se.
7. Thlanlaih :
(a) Thlanlaih laia kan inchhawk rang lutuk thin hi tlawmngaihna thil mah nise, hna a tisawt lo thin a, chuvangin val upate'n hna sawt dan tur ngaihtuaha remruat thin a tha hle ang.
(b) Thlanlaihnaa thingpui/tui sem chungchang chu mahni Branch in tha a tih anga kalpui nise.
(c) Thlanlaihnaa kal si,vawikhat mah lut lova a bul vela lo mutte leh bial hran lo siamte hi chin loh tawp tur a ni.
(d) Tleirawl zakzum zawk lut mai ngam si lote tih tlangnel dan hi rual u zawkte'n thiam ila a tha.
(e) Thlanlaihnaah phawk chhuaha intihberh vak hi chin loh nise.
(f) Thlanmual hi mawi taka rem a tha a, remchang apianga inphum mai lova, tlar nalh taka siam a tha a, thlan hung leh thlan siam pawh a intlar dik taka tihtir thin nise. Thlan hung dan tur chu Branch-in tha a tih anga siam ni sela, inzawn vel a tihbuai theih avangin thlan hung lohte pawh a tha hlei hlei.
(g) Thlan hi renchem taka laih nise.
8. Inphum thu :
(a) Zing dar 10.00 hmalama thi chu a ni la laa inphum nise, tulna bik awmah chuan YMA hruaitute leh Mitthi chhungte inbiakremna angin kal ila.
(b) Mitthi reng reng hlamzuih pawh thlanmualah inphum tur a ni a, hlamzuih phumna tur bik pawh Branch-in siam a tha.
9. Mitthi Vui :
(a) Mitthi vui inkhawm hi a thia awmna Kohhran thuneihna a ni. A hma lama invui liam a tha. A chang chuan mitthi vui leh thlalak hun atan hun rei tak kan hmang thin a, hei hian khawtlangah harsatna a thlen thin avangin invui leh thlalak hun chhung hi a rei lo thei ang bera tih nise.
(b) Mitthi vui hun hi
(i) Tlaivarpui ngai lova thi - Dar 1:00
(ii) Tlaivarpui ngaia thi - Dar 12:00
Hetianga hunbi neih thlap hi vuina inkhawma tel ngei duh tan pawh a remchang em em a ni.
(c) Kuang thlalakpui hi hun khawhral tam lo zawng leh senso tlem thei ang bera tih nise.
(d) Mi kohte lo thlen tur chin hriat loh nghah tlat hi ching lo ila, tul bik thil a awm a, thisen zawmpui an lo kal ngei a ni tih hriat chu vuina inkhawm neih zawhah lo nghah mai hi a awm hle.
(e) Thlan vur hi makpa leh tu leh fate mawhphurhna a nih rualin YMA member te mawh a ni lehzual.
(f) Mitthi vui tute kal liam hmaa thlan vur nghal chuk chuk lovin, innghah deuh a tha.
(g) Kohhran vuina inkhawm neih hmaa an thawhna department emaw, pawl hrang hrangten emaw hun neih hi kan ching a, hetiang kan chin chuan vui hma hi hetiang hun hian kan hmang khat thei mai dawn a, chuvangin Kohhran vuina inkhawmah hun tawi te te kan hman thin ang hi la ni zel thei se a tha hle.
10. Kuang :
(a) Kuanga indah ngeia kan inphum tak avang hian thingzai mante a lo to ta nen, mi tam tak tan harsatna a lo awm ta, hemi su kiang tur hian YMA in In tinah kuang man tur pawisa khawnin, chumia pawisa tling khawm chuan thingzai an lei ta mai thin hi mitinin tlawm taka kuang kan neih theih phah avangin a tha em em a ni.
(b) Kuang siam hi mitin tan a harsat avangin a siam thiam deuhten bengvar chhuah hram nise; tin, kuang siamsa lo neih lawk hi a chin tlak hle.
(c) Kuang khuhna hi mi tam ber tan thil hautak a nih avangin mipui vantlang mittlung tur YMA in ngaihtuah nise a tha hle.
11. Thawmhnaw phum tel : Mitthi an awm hian an kuang chhungah puan te, kawr te kan dah teuh thin a, a tangkai miah bawk si lova, a la dam tana tangkai tur thil chu phum tel lo tura inzirtir a tha.
12. Kuang zawn : Kuang zawn hi makpa mawha ngaih a ni deuhva, hetih karah hian mi tlawmngai leh bengvarte'n kuang an zawnpui thin hi thil mawi tak a ni e.
13. Kuanga in dah hun :
(a) Kohhranin vuina inkhawm a buatsaih dawnin kuangah kan inkhung chauh thin a, kuanga indah hma ching ila, a duhawm hle.
(b) Natna hlauhawm, awlsam taka inkai chhawn theihte a awm tak avangin chutiang vei nia ngaih thite chu an ruang saranga phui taka tuam a tha.
14. Khawhar lenpui : Khawhar lenpui hi thil hlu leh thil mawi tak, Mizo nunphung a ni a, khawhar chhungkua thlamuan tur kan nih avangin an mahni chhawk zangkhai zawnga kan awm a pawimawh hle.
(a) Khawhar kan inlenpui hian Mizo chu khawhar hla sain kan zai ho thin a, khawhar hla thiam lo nula emaw, tlangval emaw nih hi thil zahthlak tak a ni.
(b) Khawhar lenpuina boruak tichhe khawpa thusawi thin hi chin loh a tha.
(c) Khawhar ina zai chungchangah Biak In hnaih deuh, thawm hriat phak chinah chuan Kohhran ngaihdan ngaihchan thiam nise.
(d) Khawhar lenpui chungchangah khawtlanga thawhhona a that zawk nan leh chawpchilha hetiang thu rel fo a ngaih loh nan, veng chhunga Kohhran hrang hrang hruaitute nen inrawn tlangin hruaitu chan chan thu-ah kalphung tur siam fel a tha hle.
15. Khawhar In riah :
(a) Khawhar chhungkua tanpui leh thlamuan turin tlangval tlawmngaite khawhar inah an riak thin a, zing meichhem, tuichawi leh thing senghawi velah khawhar chhungte an chhawk zangkhai a, a tha em em a ni. Zan hnih khat chhungkhat hnai leh thian tha, nula tlawmngai an riak thin pawh hi thil tha tak a ni.
(b) Khawhar in-ah hian a nawlpui chu zan 3 (thum) riah ni sela, khawhar chhungte'n thian tha leh ngam tlak tlawmngai tura an chelh duh chuan pawi lovah ngai ila.
(c) In riak tlangvalte'n mutna hmun bik neih hi a mawi lova, a remchan dan ang anga haw hmasate lo siamna hmun apiang lawm taka pawm thiam a tha.
(d) Thiante puanthuah sawisa a phawk thawh te, puanthuah nei lova riah ve ngawt te, khawhar riahpuinaa zu ruih te, khawhar chhungte mitmei hmu lem lova lehkhaden lakluh te, thu bawlhhlawh pui puia hram te,bengchheng siam te ching lo ila.
(e) Khawhar chhungte pawhin In riak te, thlan hungtute chaw eipui te, an puanthuah suk sak te chin loh tur a ni.
(f) Khawhar riahpuitute leh khawhar chhungte mut hun chungchangah mitmei inven tawn thiam a tha a, mut hmaa tawngtaina hman kan ching ta hi thil tihawm tak a ni e.
(g) Branch hruaitute leh rual u te'n khawhar in riak te hnena nunphung tha leh awmdan mawi an sawi thin hi a tha hle.
16. Inralna:
(a) Tunlaiin pawisa faia inral kan uar ta fu a, a tha ngawt mai amaherawhchu pawisa neih remchan ang anga inral hi thil zahthlak a ni lo tih hria ila, hum neih loh vanga khawhar ina kal hreh phah hi thil tihawm loh tak a ni.
(b) Ruang awm laia ralna inpek hi kan hreh thin a, mahse ruang awm lai pawhin insensona tam tak a awm tih hriain ralna inpek hi hreh hauh loh tur a ni. Pawl hova inral duh pawhin hun hmalam zawn hram a tha a, tlai khawhnua inral hian lusun a tirei mai mai a ni tih hriat tur ani.
(c) Chhungkaw hotu ber hnenah kher ralna pek kan tum thin a, chuvangin chhungkaw hotu ber hi ualau deuhva awm thiam a tha. Remchang lo napuiah chuan chhungkaw hotu ber kher pan lovin chhungkuaa a remchang hnena pek mai hi ching ila.
17. Pangpar dah : Hun rei vak lo atang khan ruang chunga pangpar dah kan uar thar a, kan uar deuh deuh bawk a, hei hian thih ni-ah michhia leh mi tha a thliar ta hle mai. Chuvangin kan thei a nih chuan pangpar leina man hu khan inral ching zawk ila, a tha khawp ang. Pangpar dah lo thei lova inngaite kan awm a nih pawhin thlen hun hunah ruang bula dah mai zel nise.
18. Puana intuam : Mizo chu laina hnaite chauh puana intuam thin kan ni a, intuamna puan hi ruang tuamna tur a ni a, ruang tuam ve awm lo takin puana intuam hi a mawi lo hle.
19. Thlan thut : Mizo danah chuan kan thisen zawmpui, khualkhuaa thi kan vui ve phak loh chauhvin thlan thut a ni thin. Hei hi Mizo nunphung dik tak a ni a, chhunzawm zel atan a tha.
20. Lungphun : Lungphun hi a hautak lo thei ang bera tih thin nise.
21. Thih champha serh : Awmni kham hiala laina leh thenrual thate puna thih champha serh hi tihphunga hman loh a tha hle mai.
22. Hlamzuih : YMA General Conference chuan hetiang hian hlamzui chungchang a rel a; "Mi, thla thum (ni 90) hnuai lam a thih chuan hlamzuiha thi a ni ang. Mitthi kan insawngbawl dan leh intawiawm danah YMA te'n mitthi pangngai anga buaipui (khawntesep, inriahpui, zualko etc) tur china kan ngaih chu thla thum chin a ni" (YMA General Conference 1982 thurel 12-na).
23. YMA Chibai buk : Mizo hian thihna hi kan la thutak hle e ti lovin mitthi ruang zah dan erawh chu kan thiam lo hle a, a chhan chu kan hnamin inzah lantir dan kan neih loh vang a ni. Chuvangin 1977-a YMA General Conference chuan hetiang huna hman turin Chibai buk dan a chher chhuak ta a.
(a) Kut dinglam koki zawna thleh chhoh tur a ni a, kut tipharhin, kutphahin mahni hmai lam a hawi tur a ni.
(b) He chibai buk dan hi kawng laka mitthi ruang kan tawh chang te, mi ropui thlan kan tlawh chang te pawhin hman theih a ni.
(c) Kawng laka inbiak phak lohva hmelhriat kan hmuh te, kawnga hmelhriat kan tawh a, inbe ding kher lova inchibai nante hman theih a ni bawk.
24. Mi zawn :
(a) Khualkhuaah damlo emaw, mitthi emaw dah tur an awmin kan dahna tur khuaah chuan zualko intirin ramri-ah zahawm takin inhlan thin ila.
(b) Tunlaiin hmun thenkhatah mi zawn inchuhte a la awm a ni awm e. Hmanlaia mi zawn inchuh dan kan thiam tawh si lova, inchuh hi chin tawh loh tawp tur a ni.
25. Mikhual thi :
(a) Mikhual thi hi kuanga dah ngei a tha a, ruang lakluhna Branch khan tum thei hram ila, YMA-in puanin tuam ila.
(b) Chhuak leh thuai tur mah ni se, thutthleng rem, an kaldan tur remchang dappui, laina bul zual pun nghal mai thu-ah te leh chawpchilha mamawh thilah YMA ten bengvar chhuah ila a tha e.
(c) Tlawmngaia ruang zuite hian mahni intodelh tum ngei tur a ni.
(d) Ramdang mi leh hnamdang, veng chhunga a nghet lova awm thih chungchangah :
(i) Branch-in tul a tih loh chuan khawn tesep khawn a ni lovang a, tlaivarpui kher a tul lo. Ruang thawnchhuah thuah pawh Branch-in mawh a phur lovang.
(ii) Dan lova awmte lek phei chu Branch-in anmahni buaipuinaah mawhphurhna a nei lo.
26. Sar thi : Pipute hunlai kha chuan sarthi chu in chhung pawh lut lovin an vui thin. Tunah erawh chuan mitthi pangngai ang chiahin kan sawngbawl thei ta a, hei hi thil tha tak a ni.
27. YMA leh mitthi vui : Tunlaiin hmun thenkhatah Kohranin a vui loh chi, YMA in a vui tak sawi tur a awm ta zeuh zeuh a. Loh theih lohna avanga kan YMA hruaituten mitthi an lo thlahliam thin hi a awm hle a ni.
28. Damlo en : Damlo na zualte kan lenpui thin a, tlaivar hialte pawh a tul fo thin. Heng hi hre reng ila :
(a) Damlo kha biak kher emaw, hmuh kher emaw a ngai lova, a chinchang chu a chhungte hnenah zawh mai tur a ni.
(b) Damlo en kan ni a, thawm dim ila. Damlo na zual deuhte an nih phei chuan thawm dim a tul lehzual a, keimahni hlimna lam ngaihtuah tur kan ni lo tih i hre reng ang u.
(c) Damlo enkawltute a tul anga chhawk zangkhai hi kan tih tur a ni.
(d) Damlo chhungte a tul anga kawng hrang hranga an mamawh phuhruk sak tum ila.
(e) Damlo kha midang buaipui ve chi an nih loh chuan tlawmngaih chhuaha buaipui ve talh tum lo ila.
(f) Damdawi in leh hmun danga damlo kan/tlawh hian hum neih kher a tul lo. Hum tur neih loh vanga kan/tlawh loh phei chu chin loh chi a ni.
29. Ruang phurtu motor-ah Flag dum tar thin nise.
30. Thlanmual enkawl dan : Thlanmual hi mitthi te phumna hmun tur a ni a, a humhalh leh a enkawlna chungchangah YMA, VC leh Sorkar ten mawh kan phur tlang vek a, chuvangin mimal leh pawl ho laka humhim tlat hi kan tih tur a ni a, neitu chan chang taka enkawl hi kan mawhphurhna a ni. Thlanlaihna hmanrua hi Branch-in mahni intodelh theih hram ni se.
31. Thlanmual In sak : Thlanmual In sak hi thlanlaihna hmanrua dah nan leh tawm hulna atan a tangkai hle. Branch tinin neih a tha hle.
32. Mibo zawn : Mibo/Ruang zawn hun chhung hi ni 7 (ni sarih) tih kan pi pute atanga kan lo neih hi a tha tawk hle. Tui tla zawn thu bikah hian tui thiam lo kal teuh hi a hautak a, a sawt lem lo hle. Mibo/ruang zawnah hian a huamchhung Branch te thu ngaichang ila. Mibo/mi ruang zawnnaa kal ten ipte, chem leh puan ken ngei tur a ni. Ei leh in thilah mahni intodelh a tha.
Source : Central YMA Website
Post a Comment