THATNI KAIHHRUAINA INNEIH CHUNGCHANG - TIMES OF MIZORAM

Home Top Ad

Post Top Ad

THATNI KAIHHRUAINA INNEIH CHUNGCHANG

THATNI KAIHHRUAINA  - INNEIH CHUNGCHANG


1.    Man :

(a)    Mizo nunphungah man neia inneihna siam hi kan dan nghet tak a ni a, cheng zali leh sawmhnih hi tunlaia man tlanglawn ber niin a lang a, a awm tawk hle a ni.

mizo hnam dan(b)    Kan Mizo danah chuan Palal, Sumhmahruai, Pusum, Ni-ar, Naupuakpuan leh Sumfangte hi mi pakhat den den chauh an eitir thin. Tunlai hian man tang pakhat pawh mi pali panga lai ineitirin manin a daih bak thlengin kan sem ta zel a, man ni hauh lo pawh man anga phuahchawpin man eiin kan ineitir duh ta hial a. Hei hi thil tha lo tak a ni. Kan Mizo dana man tang kan ineitir dan ang hian man tang pakhat hi mi pakhat chauh zel ineitir ila, loh theih loh thilah chuan pahnih pawh a awmah ngai ila, kan man ineitir zat pawh hi cheng sawmhnih aia tam lo nise a tha hle ang.

(c)    Man inhlan zana man eitu leh man hlantute chawhlui buatsaih sak hi chin hauh loh tur a ni.

(d)    Man teltute’n man hlantute laka man baka thil dang an lo phut fiam thin hi tih loh nise.


2.    Sawmna :

(a)    Inneih sawmna (Card) kan sem thin hi a tha a, mahse kan uar lutuk palh ang tih a hlauhawm thei a, kan inbuatsaihnain a tlin tawk chin erawh chu hriatthiam a tha.
(b)    Tunhnai te atang khan Mo leh Mopa thiante’n Special Invitation vuahin veng chhung nula leh tlangval zawng zawng sawm an ching a, Special vuah siin an tlangzarh viau lawi a, a fel lo hle a ni. A tul anga kawng tinrenga min buaipui thei turte hnenah chauh Special Invitation hi pek ni thin se a dik ang.

3.    Incheina :

(a)    Inneih ni-a incheina hi a hautak lo thei ang ber zawn zel ni se.

(b)    Inneih ni-a Mo-in ‘Veil’ khum kan ching ve ta hi sap ho tihdan khingbai taka kan lo lakchhawn ve a ni awm e. Sap ho zingah chuan nula thianghlimin pasal an neihin ‘veil var’ an khim a, chu pawh chu awmze nei takin a hawn hunte an siam thin. Keini hian ‘veil’ hi inneih nia mo lu chei nan, inkhim mawi nan kan hmang a ni ber a, intihhmuh zui tlak a ni lo. Tumahin i ching zui tawh lovang u.

4.    Mo lawm :

(a)    Zana mo lawm hi YMA chuan tha kan ti lo.

(b)    Hmun khata mo lawm hi kan ching tan ta a, hei hian hun ren thu-ah te, sum leh pai thu-ah te min chhawk zangkhai. Kan mi sawmte tan pawh a hna khat a, chin zui zel tum ila.

5.    Mo hruai :

Tunlaiin mo hruai dan a hautak zawngin kan intihhmuh mek a, hei hi thil tha lo tak a ni. Inneih zawha lawi tawh hnua lawi tha leh tura in hawtir leh te hi thil tul lo tak a ni bawk. Mo bungrua te pawh hi mo lawm hlanin lo la fel et ila, a hna khat zawk daih ang.

6.    Inneih nia chindan mawi lo :

Mo lawm nan tia mo neitu thil leitir talh hi chin loh tur. Inneih tuk lama mi tlemtein mo lawmna siam hran leh hi a mawi lo hle. Inneih ni-ah mo neitute titlaran zawnga chet chin loh tur. Mo lawm runpui tin hnua rik bung bung hi chin loh a tha. Inneih ni tlai lama ruai siam hi chin loh tawp tur a ni e.

7.    Thuam chhawm :

Kan Mizo danah hmeichhiain a pasal inah heng- Pawnpui, Thul, Puan, Puanbu, Zawlpuan (Puandum pahnih) leh Phurhhlan te hi a chhawm lut tur a ni. Pawnpui kan hman loh hnuah Rizai kan chhawm a, Thul aiah Thingrem kan chhawm bawk. Tunlai hian mi khawsa thei deuhten thil man to tak tak, Mattress, Wardrope, Almirah, Khum etc. inchhawmtir an ching hlawm a, thil tha awm takin lang mahse kan inthik chhawn zel avangin nei lo chung pawha chhawm tum pawl kan awm ta hial a, kan khawtlang nunah harsatna a thlen mek niin a lang. Hei hi kan tihreh vat loh chuan vai ho Dowry ang chauh a ni dawn a, chuvangin Mizo hnam dan anga kan hman tlanglawn ber- Rizai, Thingrem, Puan, Puanbu, Zawlpuan leh Phurhhlan chhawm hi a tawk em em a ni.


8. Thian :

(a)    Mizo hnam danah thian man hi awm ngei tura ngaih a ni lo. Thian man kan la a nih pawhin thiana min hmangtu kha hman ve leh a ngai a, chutiang hunah chuan inrulh a ni thin. Tin, thian man hi mipa lam kan intum tir thin a, hmeichhe tum tur zawk a ni.

(b)    Thian man lak duh talh kan awm a nih pawhin rual tlang deuhva kan kal theih nan hetiang hian ruahman ila-

Tualchhungah        -    Rs 10/-
Veng pawnah        -    Rs 20/-
Khualkhuaah        _    Rs 30/-

9.     Lawi Ar :

Lawi Ar hi man eitute’n an thawh ber a, vulh atan a chi a tha duh bik an ti nghe nghe. Hmanlaiin lawi Ar ruk an ching thin a, a mawi lo em em. Thangtharte’n kan ching ta lova, a lawmawm vei nen, tunlai hian ching thar leh kan awm a ni awm a, a pawi khawp mai. Tih loh tawp tur a ni e.

10.    Thla serh :

Tun hmain Thla serh an lo nei thin a, tun thleng hian kan la nei titih deuh roh va, chubakah thla chawhma thla chawhnu tih velah pawh lo puithu tawk kan la awm a ni awm e. He thil hi puithuna zingah pawh a atthlak pawl tak a ni tih i hre theuh ang u.


11. Tul lova inkhawhralna :

(a)    ‘Wedding Cake’ hi sum senna chuangtlai mai a nih avangin chin loh a tha.

(b)    Inneih zungbun atan man to tak tak hman kan ching a, hei hi thil tul lo a ni e. Inneih zungbunah chuan man tlawm deuh hman i tum ang u.

(c)    Inneih nia mo neitu In lam cheimawi hi kan ching hle a, chin loh chi a ni.

12. Thlalak :

(a)    Inneih nia thlalak hi uar chin tawk neih a tha hle ang.

(b)    Biak In chhunga inneih thla kan lak dawn chuan inneihtirtu biakrawn a tha hle ang.

(c)    Inneih inkhawm ban hnua thlalak nana hun rei tak khawhral hi bansan a tha.

(d)    Thlalak lam lo buaipui tur bik siam hi a finthlak hle a ni.

THATNI KAIHHRUAINA  - INNEIH   CHUNGCHANG

Source : Central YMA Website

No comments:

Post a Comment

Post Bottom Ad