mizoram election 2018Vawiin khan Falkawn  Referral Hospital-ah Health Minister Pu Lal Thanzara chuan damdawi man tlawma zawrhna Jan Aushadhi Store (Generic Drug Store) a hawng a, he hunah hian National Immunization Day – Pulse Polio Immunization 2018 a hawng nghal bawk a ni.

Health Minister Pu Lal Thanzara chuan mipuite tana damdawi quality tha man tlawm zawka lei theihna Jan Aushadhi store Falkawn Referral Hospital-a hawn a ni chu lawmawm a tih thu a sawi a. District Hospital zawng zawngah damdawi man tlawm leh quality tha zawrhna Generic Store hawng vek turin hmalak mek a nih thu leh kumthar lamah chuan CHC thlenga dah turin ruahmanna siam a nih thu a sawi a. Health Minister chuan mipuiten tangkai taka generic store an hman a, damdawi man man zawka an lei theihnan doctor-te chu generic damdawi chawh uar turin a chah a ni.


Pu Lal Thanzara chuan Pulse Polio Immunization (zenghri danna beihpui) chu kumin atan India ram pumah January ni 28 leh March ni 11-a hman tura ruahman chu Mizoramah chuan Pathianni anih vangin round khatna vawiina hman anih tak thu  leh  round hnihna March ni 13-a hman a nih tur thu a sawi a. Minister chuan Mizoramah kumin hian naupang 1,38,000 bawr vel hnenah zenghri danna pek a ni leh dawn a, vaccine pekna tur bik Polio Booth 1380  vel state pumah siamin, Aizawl khaw chhung leh District tinah a ni khatna atan Polio Vaccine hi mobile team ten Hospital, khawlai lun lai, bus stand, bazaar leh pre-school ah te pek a ni dawn, a ti a. Booth-a kal remchanglo leh pek hmaih zawng zawngte chu a ni hnihna atangin ni 2-3 chhungin in tin kal chilha vaccine pek vek tum a nih thu leh Team 2800 vel leh Supervisor 270 bawr velin zenghri danna pek hi an kalpui tur thu a sawi. Health Minister chuan nau pianghlim atanga kum 5 chin zawng zawngte  an awmna hnaih ber Polio Booth-a Polio Vaccine lak tir ngei turin chhung tin te a ngen a ni.

He hunah hian State Immunization Officer Dr. Lalzawmi chuan thusawiin kum 2014-ah India ram chu “Polio Free” a puan ni tawh mahse khawvel ram tlemte Afghanistan, Pakistan leh Africa ram hmun thenkhatah Polio natna hi ala awm avangin, thuleh awm hma chu Sub-centre leh NID’s awmna apiangah Polio Vaccine hi pek chhunzawm zel anih tur thu a sawi.


Vawiin program hi Pu Lalrinliana Fanai Commissioner & Secretary, H&FW department chuan a kaihruai a, Pu Lalsawma, Joint Director (F&D) leh Dr Biakthansangi, Chief Executive Officer MSHCS ten thu an sawi bawk a. He hunah hian Pu RL Rinawma, Principal Adviser to Chief Minister, Principal Director H&FW Department Dr. F. Lallianhlira leh Director H&ME Dr. T. Lalhmangaihi te an tel a ni.

Jan Aushadhi Store (JAS) ah hian damdawi dawr pangngai aiin damdawi a let thum let li vela man tlawm zawkin a lei theih a. Damdawi dang man tona chhan ber chu a tuamna (packaging) leh a cheimawina te a ni a, a man tlawm avanga quality chhe chuang lo Generic/Jan Aushadhi damdawite hi a man a tlawm theih nan a tuamna man tlawm zawk, him tawk si, a chei mawina tello hman a ni. Jan Aushadhi/Generic damdawite hi National Accreditation Board for Testing and Calibration Laboratories (NABL) pawmpui laboratory ah a that leh that loh uluk taka enfiah vek a ni.-DIPR

Post a comment

Powered by Blogger.