Family Guidance & Councelling Centre Aizawl Mizoram: Mizote pawh kan khawsak a changkang chho ve zel a, tunhma lama kan ngaih pawimawh lem loh taksa leh rilru hriselna ngaih pawimawhna chang kan hre chho telh telh a. Harsatna kan neihte mithiamte rawnin a chinfel dan a awm tih hriain Doctor leh mithiamte kan pan ta zel a, tun hma lama rilru doctor pan zak thinte pawhin an zak tawh lova, chumai ni lovin mipuite pawhin a zahthlak loh tih an hre thar zel bawk. Harsatna neiten an pan thin zinga mi Mizoram Presbyterian Kohhranin a din, Family Guidance & Councelling Centre chuan a kum telin pantu an pung chho deuh deuh a, hei hian thlarau lam mai bakah taksa leh rilru hriselna kan ngai pawimawh chho deuh deuh a ni tih a lantir a ni.
Family Guidance & Councelling Centre Aizawl Mizoram: Kum 1995-a Synod khawmpui chuan Family Guidance & Councelling Centre hi din a tha a ni tiin January 21, 1997 khan bul tan a ni a, tunah hian main centre Mission Veng bakah Branch centre hmun panga- Vaivakawn, Champhai, Serchhip, Kolasib leh Bawngkawn (A hmain Chanmari-ah a awm thin)-ah te hna an thawk mek a. Karleh Thawhlehni (January 23, 2018) hian Lunglei Branch hawn leh tum a ni bawk.
Family Guidance & Councelling Centre hrang hrangte hian an dintirh atanga ni 18.12.2017 inkar chhung khan pantu (client) 20,285 an nei tawh a ni. FG&CC te hi thuam changtlun mek zel an niin main centre ah hian councellor 3 an awm a, branch-ah hian 1 theuh an awm thung a. Centre-te hi Thawhtanni atanga Zirtawpni thleng hawn thin a niin sawrkar pisa hun hi an zawm thin a ni.
Family Guidance & Councelling Centre Aizawl Mizoram: Family Guidance & Councelling Centre thawktute chuan harsatna avanga centre pantu chu an pung telh telh niin Zalen an hrilh a. Pantu an pun chhan hi harsatna nei ten mithiamte pan nachang an hriat tak vang leh khawsak phung inthlak danglam chho zelah harsatna tawk an pun vang nia an hriat thu an sawi. Zawhna chhangin FG&CC thawktute chuan an centre pantu chhungkua a harsatna (nupa kar), ruihhlo leh inngaihzawnnate chu a langsar zual niin an sawi. Heng bakah hian an hnathawhna kawnga harsatna tawk leh phai lama lehkha lehkha zir tumte pawhin an pan thin niin an sawi bawk. -Zalen
Post a Comment