CHANCHINTHAR Aizawl 21-1-18: Cheng vaibelchhe 156 vel senga Aizawl khawpui a chengte tui hnianghnar zawka pekna tur ruahmanna chu chak taka bawhzui mek a ni. Urban Development and Poverty Alleviation department hnuaia SIPMIU chuan he hna hi buaipui chho mekin a lung hi thla thar hian phum tum a ni a. Tuna nitina Aizawl khawpui hman tura tui litre maktaduai 34 pump chhuah mek hi litre maktaduai 37 chuanga tihpun belhin nitin tui litre maktaduai 72 thelh pump chhoh theihna tura ruahmanna hi siam a ni a. Hei hi a puitlin theih chuan englai pawhin tui connection neite chuan tui an herh haw thei tawh dawn nia chhut a ni a. Tui lakna pangngai Tlawng lui atang thovin Setlak lui bul atangin a hranpa a lak tura ruahman a ni.
SIPMIU hotute hnen atanga thudawn danin he hna thawhna atan hian tuidawt an siamtir pawh a lo thleng tlan tawh a. A chhak zawka pump chhohna tur hmun siamthat hna thawh mek a nih bakah a thlang zawk ami pawh buaipui chhoh mek a ni.
Aizawl khawpui tuilakna atana kawlphetha a hranpa ruahman mek a ni bawk a. He Sub-Station hi hna zawh tep tawh a ni a, A hrui thlun luhna hna hi a kal mek bawk a, Kumin May thla hi chuan zawh hman an beisei thu SIPMIU hotute chuan an sawi a. Hetianga a hranpa hlaka kawlphetha hman tur a awm tawh dawn avang hian tui pump chhoh kawnga harsatna awm thin chu sutkian theih a beiseiawm niin an sawi a ni.
SIPMIU hnuaia Tuirial a bawlhhlawh sawngbawlna leh Chite kama Aizawl thli sawngbawlna hmunte chu Zirtawpni kalta khan Senior Management Group ten an chairman Dr. C.Vanlalramsanga hovin an tlawh a, hnathawh kalmek an enfiah.
TUALCHHUNG CHANCHINTHAR: North-Eastern Regional Capital Cities Development Implementation Programme hnuaia Aizawl khawpui tihhmasawnna tur a SIPMIU hnathawh chi hrang hrang zinga pakhat Tuirial Dumping Ground (Bawlhhlawh paihna) bula Solid Waste Resource Management Centre sak mek chu SMG hian tlawh hmasain hemi hmuna bawlhhlawh tawih thei leh tawih thei lo sawngbawlna hmun tur leh New Sanitary Landfill siam mek hmasawnna te an enho a, he centre hi kum 2019 ral hmaa sak zawh fel tum niin zawh fel a nih hunah tuna Tuirial Dumping Ground hman lai mek hi khar niin Solid Waste Management Centre-ah hian tunlai thiamna kimchang hmangin bawlhhlawh paihkhawm te scientific treatment pe a sawngbawl a ni tawh dawn a ni, bawlhhlawh tawihral thei te chu leitha a chantir (Mechanical/ Vermi-Composting) a ni ang a; bawlhhlawh tawihral thei lote chu thliar hran hnuah sum a chang thei tur a ruahman a nih avangin bawlhhlawh hal khu a awm tawh lo tura ngaih a ni.
SMG Chairman, UD&PA Department Secretary ni bawk Dr. C. Vanlalramsanga chuan sawrkar laipui leh Supreme Court (National Green Tribunal) hian India ram State tinten Municipal Waste scientific treatment kalpui vek turin nasa takin a nawr tih a sawi a. “India ram khawpui zingah Scientific treatment centre puitling a la awm mang loh lai a a nei hmasa pawla kan tang thei tur hi lawmawm tak a ni,” a ti.
TUALCHHUNG CHANCHINTHAR: Tuiriala Solid Waste Resource Management Centre an tlawh hnu hian Chite a Sewerage Treatment Plant (STP) sak mek an en leh a, STP hi Aizawl chhuah lam veng 19 te ekthli leh choka tui luan khawmna leh sawngbawlna hmun tur atana siam a ni. Chite luiah hian ekthli leh choka tui bal te sawngbawl that (treatment pek) lohin a luang lut reng a, Chite lui pawh a tibawlhhlawh nasat em thin avangin heng thlite hi a luankhawm a, fai taka luan chhuah tir leh tur a treatment pek hi he Sewerage Treatment Plant hmang hian tum a ni a, Chite lui humhalh a chhanchhuahna atan pawh he Plant hian malsawmna ropui tak a thlen ngei beisei a ni.
Post a Comment