Lionel Messi chuan Barcelona tan La Liga match 400 a khelh tlin zanah a goal 356-na a khung a, Catalan club hi Levante lakah si thum faia hnehna chanpuiin an elpui Atletico Madrid lakah point kua zetin an sang fal tawh.
Pathianni zan khan champion lai Real Madrid tan Gareth Bale-a'n goal hnih khung mah se a club a chak pui zo lo. Zinedine Zidane-a naute hi Celta Vigo nen 2-2 a inhnehtawkin a chung bera awm Barcelona chu point 16 zetin an phak tawh lo!
Messi leh goal (Infiamna Chanchinthar)
Nou Camp-a inkhelah Messi-a'n Jordi Alba tan ball chip lutin, Spain international defender Alba ball rawn tauh let chu mawi zetin a hlap lut. Barca tan hian Luis Suarez leh Paulinho ten goal khung belhin nuamsa takin hnehna an chang.
Tun season chhungin khelmual sir veilamah Messi leh Alba te an inkawp fuh chho hle, Alba hian assist vawi ruk nei tawhin heng zinga panga chu Messi tan a ni a, player pahnih te inkawp hian an club tana goal an hlawhchhuah tawh zat chu 15 a ni.
Barcelona thiampuipa hian a club tan league bikah goal 365 a khung tawh a, European league lian panga zinga club pakhat tana league goal khung hnem ber Gerd Muller-a record chu a nihrual chiah - a khum har lo ang.
Germany hranghlui Muller-a'n kum 1964-1979 inkar khan Bayern Munich tan Bundesliga match 427 a khelh aṭangin goal 356 a khung a, Messi hian match 27 zetin a khel tlem zawk. Muller-a'n inelna hrang hranga club pakhat tana a goal khung zat (525 goals) pawh nikum December thla khan Messi bawk hian Real Madrid lama chhuih lut chungin a khum tawh bawk.
Kum 30 mi Messi hi club tan goal khungtu pawimawh a ni satliah lo a, a ṭhiante tan a ṭangkai bawk. La Liga match 400 a khelh chhung hian a ṭhiante goal khung tur vawi 144 zet a siamsak a, Levante an hneh ṭuma Paulinho goal khung tur pawh kha a siamsak a ni.
Mellung dang (Mizoram Infiamna Chanchin)
Pathianni zan khan Barcelona captain Andres Iniesta chuan a club tan inelna hrang hrangah match 650 a khel tling chiah a, a chungah hian Xavi (767 match) chiah a awm tawh, a hnuaiah Messi (609) a awm bawk.
Spain international Iniesta hi kum 33 mi a ni tawh a, hliam a neih ve fo avangin match tin minute 90 khel tura rin theih a ni tawh lo.
Real an chelh -Inkhel Chanchin
Zinedine Zidane-a nauten Champions League leh La Liga nomawi kawl chungin season bul ṭan mah se beisei an phak lo. Celta Vigo tan Liverpool striker hlui Iago Aspas-a siamsak hmangin Daniel Wass chuan goal hmahruai a khung.
Chawn hliam vanga season tir lama inlan thei lo Bale hun a thleng, Wales forward hian chawlhlak hmain Toni Kroos leh Isco te pass chu goal-a chantirin dinhmun ṭhaah a hlangkai.
Aspas-a'n penalty hmangin goal phurh sut theihna hun a nei, mah se Real Madrid goalkeeper Keylor Navas chuan a dan sak. Hun tawp hma deuha Maxi Gomez-a tauh luh hmangin an sut zo, Real tan point khata lungawi a ṭul.
Real Madrid hian nikum December thla khan Champions League-a Tottenham an hneh loh hnuah, match 13 khel leh tawhin Barcelona (3-0) chiah hneh loh an nei. Mahse, tun dinhmunah Catalan club aiin match khatin khel tlem mah se season bul an ṭan fuh loh avangin an nomawi humhim a awlsam tawh dawn lo.
Kum 2017 chhunga nomawi panga chawi thei Zidane chuan, "Kar tina match kan khelh zawh apiang hian league nomawi sawi theih a ni lo. Point kan hloh zel a nih chuan kan tan champion a harsa dawn, hun rei tak ngaihtuah ai chuan match khelh hmabak pakhat chu kan rilruah a awm a ṭul zawk," tiin a sawi. -Vanglaini
Post a Comment