PU R. ROMAWIA HOVIN GOVT J. THANKIMA COLLEGE WEEK CLOSING FUNCTION HMANG

GOVT J. THANKIMA COLLEGE WEEKVawiin chawhma khan Govt. J. Thankima College (GJTC) chuan an Annual College Week kharna hun Electric Veng, Y.M.A Hall-ah an hmang a. He hunah hian Higher & Technical Education Minister Pu R. Romawia chu Khuallian a ni.

GOVT J. THANKIMA COLLEGE WEEK: Khuallian Pu R. Romawia chuan thu sawiin zirna hi khawvel hriata mizote min siam thei tu a ni a, keimahni theuha theihna awm tipuitling tu a ni, a ti a. Govt J. Thankima College chuan college hmun tha an nei chu lawmawm a tih thu sawiin RUSA (Rashtriya Uchchatar Shiksha Abhiyan) Project hnuaiah college building  thuam that chu hmasawnna lawmawm tak a nih thu a sawi a. Khawvel danglam chak tak IT (Information Technology) in ro a relna ah hian mahni kut ke a dinna bakah ram changkang zawka hna zawnna atana tangkai tur thiamna kan neih theih nan hetiang ang zawnga zirtirna hi kan kalpui a pawimawh a ni, a ti a. Zirlaite chu fuihin kan hnam la naupang mahse talent tha tak tak thalaiten kan nei a, kan hnam thanna turin rilru leh ngaihtuahna kan hman a ngai a ni, a ti a. Thalaiten mahni hnam hmangaihna (nationalism) kan neih a, he nationalism hi a tha zawnga kalpuiin kan hnam hmasawnna tur atana kan hman a pawimawh a, hmalam pan zel tura inbuatsaihna rilru kan neih a tul a ni, a ti a. Mi hnam te pawhin an tih theih leh an tlin chu keini pawhin kan tlin lohna tur a awm bik lo a ni, a ti a. Tumruh leh thahnemngai taka rilru ti paukhauh turin zirlaite leh zirtirtute chu a chah a. Pi leh pute atanga kan ze tha tlawmngaihna te, huaisenna te chhawm nung zel turin zirlaite chu a fuih a. Govt. J Thankima College chu an kal zelna turah duhsakna a hlan bawk a ni.


Khuallian Pu R. Romawia chuan GJTC Info-Apps a tlangzarh nghal a. He app hi college chungchang te,  hriattirna hrang hrang te leh thil pawimawh dang tarlanna niin zirlai nu le pate leh GJTC atanga zirchhuak tawh te nena inthlunzawmna atana hman tura ruahman a ni a. Google Play Store-ah app hi a download theih dawn a ni.

College Week kharna hun hi SU Vice President C. Lalriliana chuan a kaihruai a. SU General Secretary C. Thangmawia atangin report ngaihthlak a ni. GJTC Info-Apps chungchang thusawina Asst. Professor Pu Zoramthanga chuan a nei a. SU Secretary i/c Outdoor Games, Lalnunsanga chuan lawmthu sawina in hun a khar a. Chawhnu lamah Week Kharna hun hi chhunzawm leh a ni.

GOVT J. THANKIMA COLLEGE WEEK: Government  J.Thankima College (GJTC) hi kum 1992 khan din a ni a. National Assessment and Accreditation Council (NAAC) chuan college hi endikin C++ grade a pe a. Govt. J. Thankima College hian nikum January ni 27 atang khan Bawngkawn Brigade-a an Central Campus thar an luah tan a. Tunah hian zirlai 600 vel an nei mek a ni.-DIPR

Post a comment

Powered by Blogger.