chakma noticed to leave hortoki
File Photo
Hortoki Village Council leh YMA chuan Hortoki khaw ram chhung Tlawng lui kama awm, Chakma chhungkaw paruk chu February 2018 ral hmain Hortoki khaw ram chhuahsan turin an hriattir.

Tlawng lui kama khawsa Chakma chhungkuate hi Hortoki Branch YMA hruaitute chuan January 12-13, 2018 khan a hmunah an enfiah a; enfiah tur hian V/C president Lalhruaitluanga hoin V/C member pahnih leh Hortoki leh Hortoki Vengthar YMA hruaitu pahnih ve ve an kal a ni. Chakma chhungkaw parukah hian mi 25 an awm niin an sawi.

Hortoki YMA hruaitute sawi danin, an enfiahnaah hian mi ṭhenkhat chu an chenna inah an lo awm loh avangin an hmu thei lo a; ina awm lote chu an ina lehkha hnut­chhiahin, February 2018 chhunga Hortoki ram chhuahsan turin an hriattir a ni.

Hortoki YMA hruaitute chuan, an khaw ram chhung Tlawng kama Chakma awmte chu Bairabi thlang lam, Assam aṭanga kal an ni a, Mizo ṭawng an thiam lo a, Inner Line Permit an nei lo a, an zinga ṭhenkhat chuan mi huan enkawl hna an thawk niin an insawi tih an sawi a; Hortoki V/C remtihna loa an khaw ramah an awm an nih avangin an khaw ram chhuahsan turin an hriattir ta niin an bawk.


Hortoki rama Chakma chhungkaw paruk an awm chungchangah hian MZP headquarters, Kolasib chuan thuchhuah siamin, Kolasib leh Kawnpuia MZP hruaitute'n January 11, 2018 khan Hortoki V/C leh YMA hruaitu an sawipui tih an tarlang.

Kolasib MZP chuan, Hortoki rama Chakma-te chu Hortoki Vengthar Branch YMA-in chhuahtir an lo tum tawh a, mahse, Chakma-ho chuan, 'Nangni YMA ho hnawhchhuah theih kan ni lo,' tiin an lo chhang niin an sawi a, "Chakma ho hian silai licence awm lo an lo kawl a, Hortoki Vengthar YMA-te'n an laksak lui nual tawh a ni," an ti.-Vanglaini

Kolasib MZP chuan, Hortoki ram chhung­a Chakma-te chuan hun tiam chhung­a Mizoram an chhuahsan lo a nih chuan MZP-in nasa leh zuala hma an lak tur thu an tarlang bawk.

Post a comment

Powered by Blogger.