ZPM-in kalphung thar leaflet an tlangzarh ZPM hi ram ropui min thlentu tur a ni - Duhoma
Ṭangrual pawl, Zoram Peoples' Movement (ZPM) chuan 'Kalphung thar - Mipui sorkar' tih leaflet an siam chu January 13, Inrinni khan Aizawl Press Club-ah an tlangzarh. ZNP president Lalduhoma chuan, political party pahnih Congress leh MNF-te'n ro an rêl tawh chhungin Mizoram chu ram ropui an thlen lo tih sawiin, "Ram ropui min thlentu tur chu ZPM chiah hi a ni," a ti.
ZPM leaflet tlangzarhna inkhawm hi Rev. C Lianzuala'n a kaihruai a, ZPM Steering Committee chairman Lalliansawta'n a tlangzarh.
ZPM general secretary K Sapdanga'n leaflet-a tarlante a sawifiah a; leaflet chu thil pawimawh ṭhenkhat tarlanna chauh a nih thu sawiin, "Mipui sorkar kan din tura hmachhawp hrang hrangte tarlanna chauh a ni," a ti a, an thil tum zawng zawng chu manifesto-ah tarlan a nih tur thu a sawi.
Lalliansawta chuan, an leaflet-a an ziahte chu sorkar tawhte tih ngam loh tur chi a nih thu sawiin, "A taka kalpui kan châk tawh tak zet a, a taka kalpui a nih ngei theihna atan mipui kan ngen a ni," a ti.
Zawhna chhangin ZPM hruaitute chuan, mipui rilru sûkthlêk thlak chu an thil tum ber zinga mi a nih thu sawiin, "Sorkarna kan chan chuan bialtu MLA-te mipuite'n chîm dur dur loin, MLA-te'n an bial mipuite an pan khawm tawh ang. VIP culture tihtawp kan tum a, designation plate pawh minister-te tawhin an vuah lo ang," an ti a; MLA-te hlawh leh hamṭhatna a tih daihzai tur thu an sawi.
Leaflet tlangzarh zawha thu sawitu Lalduhoma chuan, ZPM-a tel pawl pangate'n tuipui bik leh tihpuitlin tum tlat an nei vek tih sawiin, "Chu'ngte chu thawhkhawmin leaflet-ah hian a tlangpui kan tarlang a ni," a ti a; leaflet-a ziah lan tam tak chu ram dang leh India rama state ṭhenkhatte'n an kalpui mek, Mizoramah pawh kalpui ve theih rengte a nih thu a sawi.
ZNP President chuan, Mizoram chu tun thlengin sem policy-ah a la táng tih sawiin, "Kum 5 chhungin BPL 90,000-in an tipung ringawt mai. Project hlawhchham thiang lo an tih hi a hlawhchham der a a ni," a ti. CAG Report-in NLUP thil tum pali zinga pakhatmah a hlawhtling lo tih a tarlang tih sawiin, "NLUP hi a dawngtu 9% chauhin an hlawhtlinpui tih tarlan a ni," a ti.
Congress sorkar programme NLUP leh NEDP leh MNF programme MIP leh SEDP-te chu development programme a ni lo tih sawiin Duhoma chuan, "Vote zawnna programme a ni. Min hmangaih vangin an sem a ni lo, politic aiáwt a ni. Mi retheihna remchanga hmanga intihluihna hnanrua a ni a, chutianga an salbeh chu khaw tinah tam tak an awm," a ti a; sum sem ang chu chu ZPM chuan an tih ve dawn loh thu a sawi.
Lalduhoma chuan mi din chhuahtir tum si loa, an retheihna hmanga an vote lei tum chu ṭha a tih loh thu sawiin, MNF leh Congress chu politics rapthlak tak khel mekah a puh.
Ram ropuia Mizoram thlentu tur chu ZPM chiah a nih thu sawiin Lalduhoma chuan, "Chutiang quality chu kan hotute hian an nei a, a ngaihna pawh an hria. Zoram mipuite hian min ring ngam ula, thuneihna min pe ve ula, in zawngchhang ang," a ti a; mipuite chu ṭawiawm turin a sáwm.
ZNP President chuan Mizoram dinhmun chu pastor rualte'n an vei tawh tak zet a, an ṭhu mai mai thei tawh lo tih sawiin, "Tunah hian ZPM-ah hma hruaitu an ni a, tun hi pastor rualte'n politics an buaipui nasat ber ṭum a ni. Kohhran pawh an mangang tawh tak zet," a ti.
Candidate tur chungchanga zawhna chhangin ZPM hruaitute chuan, "Candidate kan la siam fel lo a, kan siam fel har tawh lo ang," an ti.
Mizoram Election 2018 - ZPM Manifesto/ZPM Kalphung Tur Duan
1.Chief Minister-in major department a enkawl lo ang a, Council of Minister-te hnathawh a enpui ang.
2.MLA-te mimal ta tur car, sorkar suma lei ṭhin tihtawp a ni ang.
3.Mi pakhatin sorkar motor pakhat aia tam kawl awih a ni lo ang.
4.Sorkar kum nga term chhungin minister/MLA-te hlawh leh hamṭhatna tihpun a ni lo ang.
5.MLA-te an bial mipui tan dawr theih turin thla khatah ni thum aia tlem lo an bialah an awm ang.
6.Sorkarin a lei tur thlai ṭhenkhat thlangin a rate a siam lâwk ang. Sorkar leina tur aia manhla zawka hralh duh tan zalenna siam a ni ang.
7.Feh kawng, thlai phur motor kal theihna thlawhhma neitute kutkea hmangin sorkarin a lai ang.
8.Kawngpui ṭha leh tlo, kum tam tak daih tur siam a nih theih nan theihtawp chhuah a ni ang.
9.Hydel project leh ni zung (solar power) hmangin kawlphethaa intodelh thuai turin ṭan lak a ni ang.
10.Thlai, thei, thing leh maute sawngbawlna dinin, mi tam tak eizawnna siam turin ṭan lak a ni ang.
11.Sorkar hmasain a thawh laklawh, ram hmasawnna atana ṭhate chu chhunzawm vek a ni ang.
12.Danpui siamthat 73-na leh 74-nain a phal angin, tualchhung rorelnate Mizo khawtlang inrel dan mil tura siamṭhat a ni ang.
13.Elementary school enkawl turin block/village level-ah Education Committee siam a ni ang a, sorkar nen thawk dunin zirtirtu lak, sawn leh sikul thilah politics inrawlh khap a ni ang.
14.Zirna huangah zirlai naupangte mamawh leh an zir ṭhat theihna tur dah lal ber a ni ang.
15.Sorkar building-ah tualchhung kutchhuak furniture leh cheimawina dang hman a ni ang. Zirlai uniform-ah tualchhuak puan hman a ni ang.
16.Entrepreneurship Development Bank din a ni ang a, mi rinawm, taimate tan bulṭanna tur loan awlsam taka lak theih tur siam a ni ang. Loan interest subsidy siam a ni bawk ang.
17.Ṭhalaite'n an thiam inchhim tawn a, eizawn bul ṭanhona hmun Business Innovation and Transformation Centre siam a ni ang.
18.Ruang phurh politics tihbo a ni ang. Khual ruangte an khuaa phurh thlen chu sorkar mawh a ni ang.
19.Buhfai, cooking gas leh K.Oil tichingpen chu na taka hrem an ni ang a, mamawhte'n an hmuh thuai dan ruahman a ni ang.
20.Eizawnna him leh nghet nei lo chhungkuate sorkarin bank account a hawnsak ang a, damdawi-inah a thlawna enkawlna tur health scheme rintlak siamsak a ni ang.
21.BPL chhungkua dik taka survey ṭhat vek a ni ang. BPL chhungkua thi an awmin sorkarin Rs. 10,000-in a rál ang.
22.Tar leh hmeithai pension-na tihpun a ni ang.
23.Mizoram chhung leh páwna Zo hnathlakte inpumkhatna nghet siam turin sorkarin theihtawp a chhuah ang.
24.Val Upa Award siam a ni ang a, khaw tina nun ze mawi leh entawn tlakte hnenah hlan ṭhin a ni ang.
25.Citizenship Act 1955 behchhanin village census neih a ni ang a, foreigner-te chu an chungah dan anga rêl a ni ang.
26.Assam nena ramri chingfel tura ṭan lak nghal a ni ang a, Inner Line Reserve, Mizoram ta ni ṭhin kha nei let leh tura hma lak a ni ang. Inner Line pass pawh fet taka kenkawh a ni ang.
-Vanglaini
Post a Comment