indian film festival to be held in Aizawl
Mizoram sorkar leh Innovations India ṭang kawp chuan January 23-25, 2018 chhung khian Vanapa Hall-ah Mizorama a hmasa ber atan Indian Film Festival an buatsaih dawn.

Indian Film Festival buatsaih tur chungchangah hian a buat­saihtu turte'n nimin khan Aizawl Press Club-ah thuthar theh­darh­tute an kâwm a; UDPA minister Zodintluanga chuan, Innovations India bultuma Indian Film Festival buatsaih a ni tur chu a phûrawm a, chona lian tak a nih thu sawiin, "India ram páwnah pawh film festival hlawhtling taka buatsaihtute an lo kal tur hi a lawmawm hle a ni," a ti.

Zodintluanga chuan, Film Festival-ah hian India rama film siamtu hlawhtling tak takte an tel dawn tih sawiin, "International leh national award dawngte an lo kal dawn a, Mizoramin hma a sawn phah ngei a beiseiawm," a ti a; Mizo mipuite chu Film Festival-ah hian tel vek turin a sáwm.

UDPA Minister sawi danin, Indian Film Festival pual hian Asia rama khawpui tê (small town) zinga khaw fai bera puan an tum Biate khaw pualin short film insiamsiak buatsaih a ni dawn a; pakhatna, pahnihna leh pathumnate hnenah Rs. 1,00,000 sem ral a ni ang.

Innovations India managing director Capt. Rahul Bali chuan, Mizoram chu hmun mawi tak a nih thu sawiin, "Hetiang hmun mawi tak hi cinema khawvelah pho chhuah a la ni lo. Cinema khawvelah hmun mawi tak tak pho chhuah tur tam tak a awm a ni," a ti.

Capt. Rahul Bali chuan, India ram mai bakah, India ram páwn aṭangin film siamtute an tel dawn thu sawiin, "Film siamtute hian  film siamna hmun atan mite la hmuh ngai loh an duh. Mizoram hi khawvel mithmuhah pho chhuah a nih chuan tourist tam tak in hîp thei dawn a ni," a ti a; film siamtute chu Mizorama film siamna atana hmun ṭha deuh awmte an tlawhpui tur thu a sawi.

Zawhna chhangin Capt. Rahul Bali chuan, "Mizorama film siam a nih chuan Mizoramin hlâwkna tur tam tak a nei a. Film siamtute'n kawng tam takah mihring, motor leh thil pawimawh dang hrang hrang state páwn aṭanga la lut kher loin Mizorama mi hman an duh ang. Economy zawng pawhin Mizoramin a hlâwkpui thei dawn a ni," a ti.

Indian Film Festival hi Ja­nuary 23-ah chief minister Lal Than­hawla'n a hawng dawn a, Festival hman a nih chhungin film chi hrang hrang chhuah a nih dawn bakah, film chungchang sawihona hunte hman a ni ang.-Vanglaini

Post a comment

Powered by Blogger.