Aizawl FC-in North East Derby-a Shillong Lajong an hneh loh hnuah Minerva Punjab (2-1) leh Gokulam Kerala (2-0) te an hneh a, point ruk hmu tur hian inkhel an thunun tel bawk avangin I League champion lai tan champion nawn turin kawng a la inhawng zau hle.
Mizo club hian match nga an khelh tawh aṭangin point 10 an hmu a, pangana dinhmun hauhin pakhatna East Bengal point sarihin pha lo mah se match thum laiin an la khel tlem thung. AFC hian tun January 7, Pathianni hian Salt Lake Stadium-ah Mohun Bagan an hmachhawn ang.
Thawhlehna
Aizawl FC-in December 27-ah Minerva an hmachhawn a, an khingpui hi hetih hunlaia I League hmahruaitu an ni. Mizo club hian first half aṭangin inkhel an thunun a, referee Rakim Saha-a'n minute 21-naa Masih Saighani goal khung pawm lo mah se Kareem Omolaja-a'n sawisel boin minute 72-naah goal hmahruai a khung.
Goal khatna luhna tura freekick pettu Leonce Dodoz-a'n minute 86-naah Andrei Inoescu goal khung tur a siam sak leh bawk a, Aizawl FC-in goal hnihna khung tura ball an inpe kual chu sawi zui tham a tling.
Hun tawp lamah AFC an fimkhur lo a, substitute Hmingthanmawia (Valpuia) tauh let sual chu Minerva substitute Girik Khosla chuan siphurh sut ṭhen nan a hmang a, hun a tawp zui avangin Mizo club-in harsatna nei loin 2-1 in an chak.
An ṭha chho zel
Aizawl FC-in Shillong Lajong laka an game ṭha lo Minerva laka an insiamṭhat hnuah Gokulam Kerala FC khel turin Kozhikode (Calicut)-ah an zin leh nghal a, kum hlui thlah nan December 31 tlaiah mual neitu Gokulam chu 2-0 in an hneh a, goal an chhuah lo.
Portuguese coach Paulo Meneses hote hian first half-ah inkhel an thunun a, goal erawh injury time-ah chauh an khung. Vei lam aṭanga Lalramhmunmawia (Tea) cross chu Aizawl FC forward Yugo Kobayashi a inrawlh hnuah Gokulam defender Daniel Addo-a'n an lamah a su lut a, official record-ah erawh own goal ni loin Japanese forward Yugo khung anga dah a ni.
Second half-ah Gokulam insiamṭha hret mah se counter attack hmangin Aizawl FC-in minute 52-naah Andrei Ionescu hmangin an khung leh nghal a, Romanian midfielder Andrei-a'n goal a khung theihna turin MPL6 best forward H. Lalmuankima'n ball a khalh chhuak ṭha hle. Mizo club-in goal hnihna an khung hma avangin an phu ang ngeiin point thum an hlawh chhuak a, an clean sheet vawi hnihna a ni chiah bawk.
Infiamna Khawvel Chanchinthar - Krismas vuakveta che ṭha Aizawl FC
Ngaihnawm
Minerva Punjab-in Mizoram rawn tlawhin league hmahruaitu an ni a, champion beiseina sang tak an nei. Hetihlai hian Aizawl FC erawh North East Derby-a Shillong Lajong hneh lo hlim an nih avangin champion beiseina a thamral ṭan. Amaherawhchu, Mizo club hian hnehna an chan avangin champion beiseina an nung chho leh a, champion tura Minerva ringtu an tlem sawt bawk.
Minerva innghahna Chencho Gyeltshen chuan inkhelh hmain tun season-a thil tum pathum a sawi a, chungte chu I League-a Minerva champion pui, best player nih leh a tam thei ang ber goal khung a ni. Amaherawhchu, Cristiano Ronaldo nena an khaikhin avanga CG7 emaw 'The Ronaldo of Bhutan' tiha an koh Chencho hi I League vawi khat khelhna R. Laldinliana lakah a thamral. Armed Veng South tlangval Dinliana hi I League-ah tawnhriat la nei tlem mah se MPL6 best defender Dinliana a nih avangin Chencho a dah ṭha hi thil mak a ni lo.
Andrei Inonescu-a'n inkhel bul a ṭan hnuah Aizawl FC-in vawi hnih hnehna an chang a, Romanian midfielder Andrei hian goal khat ve ve a khung bakah midfield-a David Lalrinmuana nen an inkawp hnuah an goal nawr a na sawt bawk.
Gokulam Kerala tan Laldampuia chuan inkhel bul a ṭan a, Kawrtethawveng tlangval hian Chhinga Veng FC aṭangin I League club hi a zawm. MPL6-a Chanmari FC tana inziaklut Lalramengmawia chu Kerala club squad-ah hian a awm bawk.
Chanmari FC aṭanga Aizawl FC zawmtu C. Lalrosanga chu I League-ah a inlan ta a, Lunglei tlangval hi hun tawp lamah inlanin Gokulam nen hian AFC Academy pum chhuak Hmingthanmawia (Valpuia) chuan a vawi khat nan I League-ah inkhel bul a ṭan bawk. Ramhlun North tlangval Valpuia hi nikum khan National Junior C'ship-ah best player-a thlan a ni. - Infiamna Chanchinthar hi Vanglaini Chanchinbua mi a ni
Post a Comment