 |
| Representative Image |
Open Air Service neihna hmunte chu - Zemabawk, Ṭhuampui, Leitan, Bawngkawn, Ramhlun North, Chaltlang Dawrkawn, Chanmari kawn, Dawrpui, Vaivakawn, Temple Square, Sikulpuikawn, Kulikawn, Khatla kâwn, Mission Vengthlang, Bungkawn, Dinthar kâwn, College Veng, Bethlehem Vengthlang, Chhinga Veng leh Electric Vengahte a ni.
Sikulpuikawna Operation Nehemia-ah Synod moderator kal chhuak Rev. Lalzuithanga chuan, Mizoram a damlo a, mihirng ni se, cancer vei mek ang vel a ni tih sawiin, "A chhan chu zu a zalen a, chuvang chuan drug a zalen a, chu chuan a ken tel chu mipat hmeichhiatna hman khawloh a ni. Chu chuan HIV/AIDS a keng tel zel bawk a, Mizoram hi HIV vei tam lamah mihring zat aṭanga tehin India ramah pakhatna a ni," a ti.
Rev. Lalzuithanga chuan, Mizoram Presbyterian Kohhran chhung bikah September 2016 leh August 2017 inkara thi zingah hmeichhia aiin mipa 1,028-in an tam zawk tih sawiin, "Heng zawng zawng ngaihtuah hian Mizoram hian future beisei san tur a nei lo. Kan dái velah hian ṭhalai za tam tak khawvel chênin an leng vel mek a ni," a ti a; Mizoram a dam leh theih nan Synod-in hma a la a, Operation Nehemia kalpui a ni tih a sawi.
Synod Moderator kal chhuak chuan, "Mizoram hi development-ah a innghat lo a, party politics-ah an innghat lo a, sumah a innghat hek lo. Kan ram damna awmchhun chu Pathian thu-ah a ni," a ti bawk.
Synod Revival aṭanga thu sawitu Vanlalvuana chuan, Mizorama politician-te'n mipui tan rorel an duh a nih chuan Isua leh a kohhran duh danin rorel se an duh thu a sawi a, "Term hnih/khat rorel a, picnic spot neih hi kan ngaisang lo. Kan ram hi Lalpa zawn chhuah ram a ni a, zu zawrh loha chhe tur ram a ni lo; zu hmanga inchhan chhuah kan tum hi kan economy-in a ṭhat phah dawn lo," a ti.-Vanglaini
Post a Comment