mizo lalte supreme court ah zualko - zangnadawmna phut
Mizo lal hluite'n an lalna tung ding leh tur leh, tun din theih a nih loh chuan zangna­dawmna cheng vbc. 500 pe tura sorkar laipui hriattir turin Supreme Court an ngen. He thubuai hi vawiin, January 4 hian ngaihtuah leh a ni dawn nia thu dawn a ni.

December 28, 2017-a chhuak Times of India chanchinbu tarlan danin, Mizo lal hlui mi 309 telna Mizo Chiefs Council chuan tun hmaa Lushai Hills-a an lalna chu tun din leh an phût thu Supreme Court-ah an thlen a; chu chu tihhlawhtlin theih a nih loh chuan kum 1954 aṭanga an ram luah man cheng vbc. 500 pek an phût thu an thlen bawk.

Mizo Chiefs Council tarlan danin, tun hmain Mizo lalte'n ram chin neiin thuneihna an nei a, an awp chinah chhiah an khawn thei a, misual, hrem ngaite an hrem theih bakah an ngaidam thei a ni. Kum 1895-ah British hoin Lushai Hills chu an awp tak avangin Mizo lalte thuneihna tam tak an chhuhsak a, mahse, ram chhung hmun danga princely state an tihte angin Mizo lalte chu thuneihna eng emaw chen an neihtir zui tho a ni.

Kum 1947-a India independence hnuah Lushai Hills chu Assam ram bung khat a ni zui a, kum 1951-a Assam Autonomous (Constitution of District Council) Act hman a nih avangin Autonomous district paruk siam niin, chung zinga pakhat chu Lushai Hills a ni. Kum 1954-ah Assam Lushai Hills (Acquisition of Chiefs' Rights) Act pass a ni a, Mizo lalte thuneihna chhuhsak niin, lalte chu bàn an ni.

Lal bàn a nih avang hian lalte chu zangnadawmna atan kum 10 chhung buh an seng ṭhin ang zat vel pêk an ni a, hun kal zelah an dinhmun a hniam telh telh a, a ṭhen phei chu an rethei ta hle niin an tarlang.

Mizo Chiefs Council hian kum 1999-ah khan India Prime Minister hnenah zangna­dawmna atana cheng vbc. 509 dilna an thlen tawh a, hei hi Mizoram sorkarin thláwp mah se, an phût anga zangnadawmna pêk chu Mizoram sorkarin a tlin loh thu Court hriattir a ni a, zangnadawmna chu sorkar laipui pek tur a nih thu an thlen niin MCC ukil Kedar Nath Tripathy leh Lalremsanga Nghaka chuan an sawi. Sorkar laipuia Defence Mininstry e­rawh chuan Mizo lalte hnenah zangna­dawmna chu pek tur a nih pawhin, state sorkar pek tur niin a sawi ve thung.

November 17, 2017 khan he thubuai hi Supreme Court judge, Justice Madan B Lokur-a kaihhruai Bench ngaihtuah tur zingah telh a ni a, Court chuan sorkar laipui ngaihdan hriat a duh a, additional solicitor general ANS Nadkarni chuan a lo en zui tur thu leh Union Home Secretary a lo sawipui tur thu Supreme Court a hrilh. He thubuai hi vawiin January 4 hian ngaihtuah leh a ni dawn nia thu dawn a ni.-Vanglaini

Post a Comment

Powered by Blogger.