Israel hnen aṭangin anti-tank missile lei dawn
India chuan Israel hnen aṭangin Spike Anti-Tank Guided Missile (ATGM) a lei dawn a, hei hi sorkar leh sorkar indawrna, government-to-government (G to G) kaltanga lei a ni ang.
Sipaite chuan ATGM hi an duh a, Defence Research and Development Organization (DRDO) pawhin technology transfer a huam tel loh chuan he inremna hi an dodal lo a ni.
Thla hmasa khan defence ministry chuan dollar matkaduai 500 senga Israel spike missile 8,000 leina tura rawtna a siam, Request for Proposals (RFP) chu a lo sut tawh a ni. RFP hi spike missile siamtu, Israel company Rafael Advanced Systems nena siam a ni. He rawtna sut a nih hma hian DRDO chuan Nag ATGM a siam a ni.
RFP sut a nih vang hian Israel hi a lawm lo hle a, mahse an inbiak tawhna sut leh ni mah se G to G kaltlanga Indian amry-ten ATGM lei an tumna erawh hi a dodal chuang lo niin South Block offiicial-te chuan an sawi.
Defence ministry official te chuan defence lama Israel nen thawhdunna ṭha tak an neih thu an sawi a, tunhnaiah pawh torpedoes leina turin order lian tham tak an siam a, sipaite hman tur assault rifle pawh an lei dawn tih an sawi.
ATGM lei tur chungchang hi high level-ah pawh sawi a ni tawh a, inremna hi tihfel a nih chuan Rafael Systems, Bharat Dynamics Limited leh Kalyani Strategic Systems-te chuan 'Made in India' kalpuina peng pakhat atan Hyderabad-ah ATGM siamna tur factory hi an din a ngai dawn a ni.
Spike hi Nag aiin kap thui thei zawk leh zangkhai zawk nia sawi a ni. Nag hi hlawhtling taka enchhin a lo ni tawh a, meter 500 aṭanga km 4 thlenga thui kap thei a ni. -Vanglaini
Post a Comment