Football khawvela club leh player hlut zawng zirchiang ṭhintu CIES-in football player hlut zawng an zirchianna an tihchhuah thar berah Paris St-Germain forward Neymar chu player hlu ber a ni a, euro maktaduai 213 hlutna neiah ngaih a ni.
Brazilian forward dawtah hian Barcelona thiampuipa Lionel Messi a awm a, Argentina captain hi euro maktaduai 202.2 man huah ngaih a ni a, pathumna chu Premier League striker langsar Harry Kane niin Tottenham Hotspur striker hi euro maktaduai 194.7 hlutna nei angah CIES chuan an ngai.
CIES-in player hlut zawng an chhutnaah hian kum zat, position, contract rei zawng, an khelh ṭhat dan leh ram lama an dinhmun te an zirchiang a, Messi nena footballer langsar bera chhal ngam Cristiano Ronaldo chu 49-naah lang pha ṭawkin a hlut zawng hi euro maktaduai 80.4-ah chhut a ni.
Barcelona-in pound maktaduai 160-a an lakluh Philippe Coutinho chu CIES lam chuan Catalan club-in an ngaihhlut ang em emin an ngaihhlut pui lo a, 16-naah daih awmin Barca-in a man zat atana an insenna zat aiin euromaktaduai 37-in a hniam - euro maktaduai 123 man huah an ngai.
Goalkeeper zingah Marc-Andre ter Stegen chu hlutna nei tam ber a ni a, Barcelona keeper hi euro maktaduai 96 huah ngaih a ni. Barcelona defender vek Samuel Umtiti chu defender hlutna ngah ber a ni a, French defender hlut zawng hi euro maktaduai 101-ah chhut sak a ni.
Serie A player zingah Paulo Dybala chu hlutna ngah berah ngaih niin Juventus striker hi euro maktaduai 175 man huah ngaih a ni a, Bundesliga player zinga hlu ber chu Robert Lewandowski niin Polish striker hlutna hi euro maktaduai 107-ah an chhut sak.
Player Hlutna Sang / Man To top ten
1. Neymar (PSG)213m
2. Lionel Messi (Barcelona)202.2m
3. Harry Kane (Tottenham)194.7m
4. Kylian Mbappe (PSG)192.5m
5. Paulo Dybala (Juventus)174.6m
6. Dele Alli (Tottenham)171.3m
7. Kevin de Bruyne (Man City)167.8m
8. Romelu Lukaku (Man Utd)164.8m
9. Antoine Griezmann (Atletico Madrid)150.2m
10. Paul Pogba (Man Utd)147.5m
EPL player top 30-a lang
11. Leroy Sane (Man City )140.6m
12. Mohammed Salah (Liverpool)140.5m
13. Raheem Sterling (Man City)138.2m
15. Marcus Rashford (Man Utd)126.8m
17. Gabriel Jesus (Man City)122.6m
18. Eden Hazard (Chelsea)119.6m
20. Alvaro Morata (Chelsea)108m
23. Roberto Firmino (Liverpool)102.9m
27. Bernardo Silva (Man City)98.8m
28. Sergio Aguero (Man City)98.7m
29. Christian Eriksen (Tottenham)98.4m
30. Alexandre Lacazette (Arsenal)97.6m
*Pawisa hi euro a dah a ni a, euro 1 leh India pawisa Rs. 75.95 a intluk. m = million (maktaduai)
(Infiamna chanchin Sports Article hi Mizoram nitin chhuak Vanglaini chanchinbu a mi a ni e)
Post a Comment