Mizoram Sarva Shiksha Abhiyan Mission (SSA) leh Central Young Mizo Association (CYMA) chuan Mizorama zirna kawnga thawh dunna tur thuthlung nimin khan an ziak.
Thuthlung ziahna inkhawm hi School Education directorate conference hall-ah neih a ni a, School Education minister H Rohluna'n a telpui. H Rohluna chuan, CYMA nena thawhhona neih a ni leh ta chu lawmawm a tih thu sawiin, "A tak taka hma kan lak zel chuan ramin hma a sawnpui ngei ka beisei," a ti.
H Rohluna chuan, YMA chu Mizoramah kawng engkima kutke nih tling an ni tih sawiin, "Rualbanlote kan en danah hmasawnna tur kan la nei a, thawhhona hian rah duhawm tak a chhuah ka beisei," a ti a; sikul kal duh lo leh kal thei lote chu department aṭang ringawt chuan ûm zui a buaithlak ṭhin avangin, YMA nena an thawhhona avangin ṭha zawka hmalak theih an beisei thu a sawi.
Thawh dunna thuthlungah hian SSA aiawhin state project director Lalhmachhuana'n hming a ziak a, CYMA aiawhin president Vanlalruata'n hming a ziak bawk.
SSA SPD Lalhmachhuana chuan, tuna YMA nena an thawh dunna chu a kum 12-na a nih thu leh an thawh dun tawhnaah hlawhtlinna tam tak hmuh a nih tawh thu a sawi a; tun ṭuma an thawh dunna turte chu - kum 6-14 inkar sikul lut lo naupang dap chhuah leh sikul an luh theih nana hmalak te, naupang rualbanlo zirna kawngah vantlang rilru puthmang dik lo siamṭhat ngaite siamtha tur hmalakte a tel tih a sawi.
Lalhmachhuana sawi danin, thawh dunna hmang hian YMA sub-headquarters, group leh general conference-ahte zirna lam hawi awareness campaign neih ṭhin a ni dawn a; YMA branch-in an khua/vengah hnam ziarâng leh hnam lâmte sikul hun âwl remchangah naupangte an zirtir ṭhin dawn a ni.
Kum 10 liam taah khan Mizoramah sikul lut lo naupang 26,000 chuang an awm a, YMA nena an thawh dun hnuah tunah chuan naupang sikul kai lo zat a tlahniam sawt hle a ni.
CYMA president Vanlalruata chuan, zirna kawnga hma an laknaah thawhhona thuthlung an ziah aṭangin ṭan rual a beisei thu a sawi a; tun hnaiah ruihhlo ti thar an tam thu leh chu'ng zingah chuan kum 18 vel an tam thu sawiin, "Kan ram hi a kilkhawr lai ngaihtuah chuan rilru a khawih hle ṭhin a, zirna aṭang bawka ṭan rual hi rilruah a awm ṭhin," a ti.
Thawh dunna thuthlung ziahna hun hi School Education secretary Esther Lalruatkimi'n a kaihruai a; School Education director K Lalthawmmawia leh officer dang te, MBSE Chairman, RMSA leh SSA officer-te leh CYMA office bearer-te an tel a ni.
Post a Comment