HLAKUNGPUI ROBAWM-A VAWNTHAT TURIN LALSANGZUALI SAILO - Vanneihthanga Vanchhawng

9th January, 2018 (MSR) : Nimin khan kum 2016-a Mizo Hlakungpui Muala seng luh Lalsangzuali Sailo kutchhuak, a thawmhnaw leh hmanruate Hlakungpui Robawm-a dahthat turin a chhungte’n Mizo Hlakungpui Mual Committee kutah an hlân.

Nimin zingh khan Pi Saithangpuii Sailo, Khawbung Lalveng chuan Mizo Hlakungpui Mual Committee kutah an u Lalsangzuali Sailo kutchhuak, a thawmhnaw leh hmanruate chu chhungkaw aiawhin a hlân a. Hlanna


inkhawmah hian Pi Saithangpuii chuan an u Lalsangzuali Sailo Mizo Hlakungpui Muala chawimawite zinga a tel chu lawmawm an tih thu leh thangthar leh zel turte tan a chanchin zirchianna hmanrua atana a tangkai beisei thu a sawi a, thildang tangkai thei tur awm chi pawh chhungkua inrawnkhawmin Hlakungpui Robâwma dah luh zel an tum thu a sawi bawk.



Hlakungpui Committee Chairman Pu C Lalluia chuan Mizo Hlakungpui Mual luahtute sulhnu vawn thatna “Hlakungpui Robawm”-a dah turin seng luh tawhte sulhnu thahnem tak vawn a nih tawh thu a sawi a, Mizo thu leh hla zirbingte tan pawha hmanraw tha leh tangkai tur he Robâwmah hian kawl that a nih thu a sawi a. Pi Lalsangzuali chhungte’n Mizo hnam rohlu atana pawimawh tur phal taka Committee kuta an hlan chu lawmawm a tih thu a sawi bawk.
Lalsangzuali Sailo kutchhuak, thawmhnaw leh hmanruate hi BADP hmanga sak "Hlakungpui Robawm"-ah dah that nghâl a ni.

Mi bik Lalsangzuali Sailo, Upa S.Vanchhuma leh Sapthangi Chawngthu te fa 11 zinga upa ber hi hla phuah thiam, zai thiam, thusawi thiam leh ziak mi; Mizo thu leh hla kungpui pawimawhte zing a mi a ni. A sam a thain a sei hle a, feet 7.1 zeta sei a ni. vantlang tana a inhman nasat avangin India ram chawimawina sang Padma Shri award hial a lo dawng tawh a, Mizo Hlakungpui Committee chuan Hlakungpui Muala chawimawite zingah kum 2016 khan an lo senglut tawh a ni.

Post a comment

Powered by Blogger.