MITHAR 133 LAWMLUHNA NEN KUM 2018 ATAN CONGRESS BHAVAN HAWN A NI
Vawiin Congress Bhavan kum 2018 atan hawn programme chu Pu H. Liansailova, State Planning Board Vice Chairman leh Treasurer, MPCC in a kaihruai. Hunserh leh kumthar thuchah Pastor Lalbiakvulmawia, Ramhlun South Bialtu Pastor hnen atangin ngaihthlak a ni a, mithar lawmluhna leh Kumthar thuchah sawi Pu Lal Thanhawla Chief Minister, President MPCC in neiin hun tawpah Pu R. Lalzirliana Home Minister, Vice President MPCC in lawmthu sawina a nei a ni.
Chief Minister Pu Lal Thanhawla chuan kalkhawmte kumthar chibai bukin kum tharah Pathian malsawmna kawng tinrenga dawngtlang turin duhsakna a hlan a. Aizawl East I bial chhung atanga Congress party zawm thar mi 133 lawmlutin Pu Hawla chuan heti zat Bhavan hawnniah Congress zawm thar an awm thei hi lawmna chang hria ang u, a ti.
Chief Minister chuan, “Inthlan kum a nih avang leh BJP te hian an chak vanglai nia hriain an hmanhmawh deuh niin a lang a. Kum tir leh kum tawp lama inthlang tur keini ho leh Lok Sabhate nen kum laihawlah kan inthlang burh lovang tih a sawi theih loh,” tiin India ram President leh Prime Minister-te lo kalin PM phei chuan NEDA (North East Democratic Alliance) an thawhpui MNF unauten an tih chhiat vek tawh kan tun din leh kan state sawrkarin hma a lo lak ve na liau liau min hawn sak kha kan lawm hle. PM-in Tuirial HEP a hawnnaah khan Mizoram sawrkar duh khawp lohna lam engmah a sawi lo a. Chutiang chuan tunthlengin kan sawrkar hi India ram President leh Prime Minister lo kalte pawhin duh khawplohna engmah an sawi lo tih hi mipuiin hre rawh se, a ti.
Mithar 133 Aizawl East I Bial huam chhung atanga lawm luh aiawhin Pu R. Liansanga, K. Zoramchhuanga, C. Lalhmunsanga leh Thangchina ten thu an sawi a ni.
Hunserh hmangtu Rev. Lalbiakvulmawia chuan, “Ram roreltute hi Pathian tan nasa taka thawktute an ni. Kohhran leh ram rorelna inkungkaihna kawngah hian kan ramah chuan tha takin kan kal niin ka hria,” a ti. “Ram rorelnaah hian political party tan hian tih fuh sen pawh a har viau ang, chuti chungin kan ram politics kal chhoah hian Pathian kuthnu hi tam tak awmin ka hria a. Kan rambuaina leh remna tluantling awmna atana hma la tute pawh political party te an ni. Chutiang kawnga hma la nasa party chu teh dawn ila, Congress party hian mark in hmu sang viau in a rinawm,” a ti. Ram tana rawngbawltute hian mi that lohna sawi loh a tha, mi ram leh state dang kan ngaihtuah chuan kan ram politics hi chu a la thianghlim hle in, Pathian malsawmna kan la dawng a ni a tih theih awm e, Pastor chuan tiin, “‘Rorelna fel hi lui angin luang se’ tih hi kan nunin a tlin em tih erawh kan in en a ngai. Pathian thu kan awih chuan ramin malsawmna a thlen thin. Chutianga dik tak leh huaisen taka kal zel thei turin vawiinah hian kan ramhruaitute hi ka fuih nghal che u a ni,” a ti.
Pu R. Lalzirliana, Home Minister, Vice President MPCC chuan inkhawm tawpah lawmthu sawiin, kumthar duhawm tak min hruai thlengtu Pathian hnenah lawmthu awm se tiin, kumhlui lamah te leh tunhma lamah mi huatthute sawiin mi lawmloh zawngte pawh lo ti tawh mahila, kumtharah chuan mite tana malsawmna nih tumin inpumkhat leh inhmangaihna hi kan party chhungah he Kumthar hian rawn herchhuah pui ngei rawh se, a ti.
Mizoram Pradesh Congress Committee (MPCC) PRESS RELEASE
(LALHRUAITLUANGA KAWLNI)
MPCC Media Department
Post a Comment