CHANMARI LEH VENGLAI YMA TEN ELECTRIC VENG THLAN LAIH PUI

CHANMARI LEH VENGLAI YMA TEN ELECTRIC VENG THLAN LAIH PUI

LUNGLEI CHANCHINTHAR: Electric Veng Lunglei chuan kum 2018 ah mitthi pariat (8) vui tawhin vawiin khan a rualin thlan pathum laih a ni a, mi pathum vui liam an ni.
Hetianga vanduaina an tawh avang hian veng thenawm Venglai Branch YMA leh Chanmari Branch YMA te chuan vawin khan thlan an laih pui a. Chanmari Branch atangin member 50 vel leh Venglai atangin member 70 vel thlan laiin an thawkchhuak a. Anni veng pahnih bakah hian Bazarveng, Salem, Lunglawn, Ramthar leh Venghlun atang tein YMA member Electric veng thlan laih pui turin an thawkchhuak bawk a, a pumpuiah mi 550 chuangin vawiin hian thlan an lai a. Thlanmual hmun a lung em avangin Pu Joseph Lalhimpuia, Bialtu MLA chuan thlan laihna hmanrua Drilling Machine chu Electric Veng Branch YMA tan a pe.

Electric veng Branch YMA President Pu LH Lianzama chuan vengchhungin chhiat an tawh zawn laia veng thenawm ten thlan an laih pui chu thinlung taka lawmawm a tih thu sawiin "Mizo tlawmngaihna a la chuai lo va, tanpui ngaite tanpuitu YMA nihna chhawm nunga hun harsa a kan la intanpui tel tel te hi a lawmawmin hmuh a nuam a, rilru a khawih hle. Vawiina Branch dang thlan min laihpuitute leh vengchhung nula leh tlangval lusun chhungte tanpui tura thawkchhuak zawng zawngte chungah lawmthu ka sawi a ni" tiin a sawi.
Tarlan tawh angin Kumhlui thlah zan atang khan Electric veng hian mitthi pariat an nei tawh a, paruk chu lumen an ni.

Post a Comment

Powered by Blogger.