Chapchar Kût ni hnih hman a ni dawn Khualzin hîp tam tura hman ni se - CM
Chapchar Kût Organising Committee chu nimin khan chief minister Lal Thanhawla hoin CMO conference hall-ah an ṭhukhawm a, kumina Chapchar Kut chu ni hnih chhung hman an rêl.
Chief Minister chuan, Chapchar Kut chu Mizo kûtpui a nih angin, mawhphurhna chelhtute'n an tih tur ṭheuhah Mizo tlawmngaihna
rilru pu chunga ṭhahnemngai taka an thawh a duh thu a sawi a, "Khualzin tam zawk hîp thei tur leh mipui mimir huapzo thei ang bera kût hman a nih theih nan ngaihtuahna uluk taka sên a pawimawh," a ti.
Meeting-a rel dan chuan, Chapchar Kût hi Lammualah April 1 leh 2-ah hman a ni dawn a; a ni hmasa zawkah Mizo infiamna lam hawi programme siam tur niin, a ni hnihnaah zai, rimawi leh hnam lâm chi hrang hrang a tam thei ang ber telh a ni ang.
Kût chhungin mipui zingah Mizo hnam ziaráng pho lang tam thei tur zawngin hnam thuam inbel uar tura inhrilh ni se, an ti a; a remchan dan angin kût chhim tur leh a lawmnaa tel ve turin Zo hnahthlak state dang leh ram páwna awmte sâwm an rêl a ni.
Kût Pa atan Myanmar rama Chin state chief minister Salai Lian Luai sâwm tum a ni a, chief minister Lal Thanhawla chu Kût Thlengtu tura ruat a ni. Kut pualin painting exhibition, photo exhibition, flower show-cum-exhibition, food court leh handloom exhibition buatsaih tum a ni a; kût chhimtute tan veivah a remchan zawk nan No Vehicle Zone siam a ni ang.
Meeting-ah hian chanvo leh mawhphurhna semzâi a ni a; hun hman dan tur kimchang duang turin Art & Culture Director kaihhruai Programme Sub-Committee din a ni. -Vanglaini
Post a Comment