Dawrpui Vengthar Congress Unit chuan nimin khan Aizawl West College auditorium-ah mi thar lawm luh inkhawm an buatsaih a; an hun hmanpuitu, minister Lal Thanzara chuan, Pathianin a chhe lai siamṭhatu atan Congress sorkar a hman mek thu a sawi.
Lal Thanzara chuan, MNF-in an sorkar chhungin ram ro tling tur thil tam tak an tichhia nia sawiin, "State Referal Hospital an tihchhiat vek tawh chu harsatna tam tak paltlangin Congress sorkarin a din thar leh a. Kut tling loa sum lak vanga rauhsan tawh Tuirial Hydel Project pawh India Prime Minister hialin a rawn hawng. A ngaihna an hriat loh Greater Aizawl Water Supply Scheme Phase-II chu harsatna lian takte paltlangin ṭha takin zawhfel a ni," a ti.
MPYCC president Dr Lalmalsawma pawhin thu sawiin, Aizawl West-II chu opposition bial la ni rih mah se, Congress sorkarin kawng engkimah ruling bial ang maiin hna a thawh thu a sawi a; "Bial mipuite zarah Aizawl West-II hian Congress MLA an neih ngei ka ring tawh," a ti. AMC-a MNF kaihhruai sorkar chu Aizawl khawpui chhung bawlhhlawh pawh enkawl zo loah a puh bawk.-Vanglaini
Post a Comment