Sorkar laipui scheme, Basic Services to Urban Poor (BSUP) hnuaia Lawipu, Aizawla mirethei chenna in nei lote tana in sak chu nimin thleng khan chhungkaw 161-in an luah tawh.
BSUP hnuaiah hian miretheite tana in luah tur hi hmun pali - Lawipu, Durtlang, Rangvamual leh Edenthar Vengahte siam a ni a, a vaiin chhungkaw 1,096 luah theih tura siam a ni. Tun dinhmunah chhungkaw 408 luah tur awmna Lawipua mi chu luah theih a ni tawh a, December 11, 2017 khan UDPA minister Zodintluanga'n allotment a sem a, nimin thleng khan chhungkaw 231 hnenah luah phalna (allotment) pek tawh niin, chu'ng zinga 161 chuan an luah lut tawh a ni.
Chhungkaw 320 luah theih tur Durtlanga mi leh chhungkaw 368 luah theih tur Rangvamual/Edenthar Venga mite erawh chu peih a la ni lo.
Zawhna chhangin UDPA Minister chuan, Durtlang leh Rangvamual/Edenthar Venga mite chu luah theih tura buaipui mek a nih thu a sawi a, "Hun rei lo tê chhungin luah theih tura peih beisei a ni," a ti.
Zodintluanga sawi danin, BSUP hnuaia inte chu luah diltu an awm chuan an dinhmun endik a nih hnuah, danin a luah thei tura a tih ang an nih chuan allotment pek ṭhin a ni ang.
UDPA Minister chuan, miharsa zawkte'n in luah tur an neih theihna atan sorkarin theihtawp a chhuah tih sawiin, "Scheme hrang hrang hnuaiah mi harsa zawkte in luah tur hi buaipui mek a ni," a ti.
Zodintluanga sawi danin, BSUP hnuaia hmalakna bakah hian Housing for All hnuaiah in hmun nei, a sakna tur nei lo leh in luah tlak tawh loh khawpa chhiate ṭanpui tura hmalak mek a ni a; hemi atan hian Aizawl leh Lawngtlai district tan bik first instalment hmuh tawh niin, ṭanpuina hi Aizawl district-a chhungkaw 187 leh Lawngtlai district-a chhungkaw 141 hnenh pek a ni.
Chhungkaw eng emaw zat chuan in an sa zo tawh a, ṭhenkhat chu khawsak harsa tak tak an nih hlawm avangin tlawmngai pawlin an sakpuite pawh an awm. Tlawmngaihna hmanga inpui tawn an awm chu sorkar hotute chuan lawmawm an ti hle a ni.-Vanglaini
Post a Comment