EAST TUIPUI BIALTU MLA PU T SANGKUNGA’N TZP GEN. CONF. 33-NA A HMANPUI



Tuipuiral Zirlai Pawl General Conference
Vawiin khan Tuipuiral Zirlai Pawl General Conference vawi 33-na Khuangthing Community Hall-a hman mêk “Vantlang Inkhawm” chu Bialtu MLA Pu T Sangkunga’n a hmanpui.

Vawiina Vantlang Inkhawm hi Vice President K Lalnunzama’n a kaihruai a, President Tv Lalsailova’n thu sawiin, Asst. Gen Secy Samuel  Lalrinsanga’n report a pe a. Zirlai hlawhtling mi 97 hnênah chawimawina thuziak an hlan a, Special Award mi 6 hnênah an hlân bawk a ni.

Thuchah sawiin khuallian Pu T Sangkunga chuan Zirlaite chu ram kalsiamtu pawimawh tak an nih thu sawiin ram hmasawnna kawng hrang hrang ngaihtuah thin an nih rualin zirna atanga ram hmasawnna ngaihtuah bing zual turin a chah a. Zirlaite’n lehkha an zir laiin tlawmngai pawl hrang hrangah akûl ataia inhmang lo tur leh theitâwpa

lehkha zir turin a chah a. Theitâwpa beitute chu zirlai thiam tak nia lang lo te pawhin hlawhtlinna an chang nge nge zel a ni’ a ti.

Khuallian Pu T Sangkunga chuan MLA a nih hma atanga Bial tana a lo vei lian ber pakhat, Tuipuiral inkalpawhna pawimawh leh tangkai tur “Khuangthing to Thekte” cheng vaibelchhe tam tak senga PMGSY hmanga a MLA hun chhunga laih a ni chu lawmawm a tih thu a sawi a, Bial-in zirna lama hma a sawnna atan English Medium mimal leh kohhran dinte chu a theih ang anga chhawmdawl chhunzawm zel a tum thu a sawi bawk a ni. Heng bâkah hian East Tuipui Constituency chhunga hmasawnna hnathawh hrang hrang a tarlang bawk a ni.

TZP General Conference hi nimin atanga hman tan niin nimin khan Palai rorel inkhawm neih a ni a.  Resolution pahnih – “Tuipuiral huam chhunga Primary Health Center-a thawktu leh hmanraw indaih lohna MLA Election hmain thuam that ni rawh se” tih leh “Sawrkar enkawl Higher Secondary School kan neih theih nan sawrkarin a rang thei ang berin hma la rawh se” tihte a ni. TZP General Conference hi Tuipuiral Group YMA leh Tuipuiral Block MHIP hruaitute’n an hmanpui a. Tuichangral Zirlai Pawl President Pu Lalhmangzuala’n a hman bawk a ni. Tukinah hruaitu thar thlan niin President atan Pu K Lalnunzama thlan a ni.

Vawiin chhawhnu khan hi zaninah palai thlahna hun an hmang ang a, naktuk zingkarah Khawbung WATSAN Sub-Division, PHE Department nen tangkawpin Khuangthing khawlai thenfai hnatlang an nei dawn bawk a ni.-DIPR

Post a comment

Powered by Blogger.