Association for Voluntary Blood Donation (AVBD) chuan thuchhuah siamin, December 2017 tìr lam aṭanga Aizawla blood bank pahniha Krismas puala thisen pek hun, Blood Donation for Christmas an huaihawta thisen petute zawng zawng chungah lawmthu an sawi. Krismas puala thisen pek hunah hian mi 311-in thisen an pe tih an tarlang.
AVBD tarlan danin, Blood Donation for Christmas-ah hian mi eng emaw zatin thisen an pe a; thisen petute hi nimin thleng khan Aizawl Civil Hospital Blood Bank-ah mi 284 leh Synod Hospital-ah mi 27 an ni.
Mi nunna chhanna atan leh mi dangte tana malsawmna ni tura thisen petute zawng zawng an chhuan tak zet thu sawiin AVBD chuan, "An inpekna a fakawm kan ti em em a, mi tlawmngaite thisen pek hi damlo, thisen mamawhtute tan malsawmna a nih a, an ṭhat chhuahpui ngei kan beisei tlat a ni," an ti.
AVBD chuan, Aizawla blood bank pahnihte'n December 2017 thla laihâwl vel aṭangin blood donation camp an nei mumal tawh lo lo a, donation camp an neih chhunah pawh ṭum dang anga tam tham tak tak pek a ni meuh lo tih an sawi a; donation camp tlem chhan chu Krismas hnaihah Mizo mipui leh pawl hrang hrangte Krismas atana inbuatsaihna lamah an buai a, thisen pek lam an ngaihsak hman meuh tawh loh vang nia a lan thu an tarlang.
AVBD chuan, kum tinin December, January leh February thlaahte blood donation camp a tam lo a, thisen petu an tlem ṭhin tih tarlangin, thisen pek uar zel turin Mizoram ṭhalaite an sáwm a; Mizoram mipui, a bikin thisen petute zawng zawng kum thar 2018 chibai an bûk a ni.-Vanglaini
Post a Comment