~Vena Tlau
Mizo innei man leh muala ka pu thu min hrilh hi ṭhangthar lehzelte tan pawh a pawimawhin ka hria a, hmun hran tlâng hran hranah a dikber vek kher ang ka tihna ni lovin, a tlângpui chu a dik khat viau in ka ring.
Inneihna a Hmeichhe man hi Rs 420/- a ni a. (Hei hian Bungrua anga man neihna lam a kawk lova, chhûngkaw 2 te inchhûngkhatna thuthlung nemnghehna a entir a ni. Tunlaiin hmeichhe man sân rawt ching an awm. Mihring hi Bungraw hralh a hralh chi anni lo. Hlutna chhut chhuah theih loh khawpa hlu anni. Inhralh satliah chi a ni lo.)
Ṭhutphah hei hi, tunlai tihdanah chuan 'Rs20/- hi ṭhutphah atan kan kir leh e' tiin man dawngtu ten palaite an kir ṭhin. Ṭhutphah hlutna leh an kir chhan hre lo hi a tamzawk kan nih ka ring. Kan Mizo Pi leh pute kha mifing, thuhnudâwn zet mai an lo ni a, an ngaihtuahna thui zia hi ka ngaihtuah fo ṭhin.
Ṭhutphah hian a tum diktak chu, Mi kan in ang lova, misual tak tak nupuite kutthlak ching te awm ṭhin a ni a. Nupuite, 'Ka tâ a nia, a man ka pe a lawm' ti a, sawisak leh sal chhawr a chhawr ching te awm theih a ni. 'Ka nupui a nia, ka thu thu' ti a ti rethei te an awm thei tih hria in hetiang laka inven nan hian mizo upa te chuan Ṭhutphah hi an lo pekir ṭhin a lo ni.
Mi in a chunga kan sawi ang khian a nupui lo ti rethei viau sela, 'Ka nupui a nia, ka thu thu, in lo sawive tur a awm lo tiin Court-ah te hial ṭan lo khawh ta se, hmeichhe chhungten, 'Ekhai! mai mai a! Aman i la tlâk hleinem. Ṭhutphah kan kir che a lawm, chuvangin kan nau hi, a thlavang kan hauh thei a, kan tâ a la ni ve e, tin ṭhutphah kan kir thlap che a lawm. Chuvangin hetianga i tih mai mai hi kan remti love.' An la tih theih nan Ṭhutphah hi kir ṭhin a ni.
Ṭhutphah hi Rs 20/- kher tur tihna a ni lova, 400 bâka a chuang hi tunlaiah chuan a rem em a, an kir mai ṭhin a ni awm e.
Tin, man leh mual thu a Mizo dân lo ropui zia hi zirfe tham a awm. Mizo te tluka hmeichhe dinhmun dahpawimawh a, an derdepna leh chak lo zawk anni tih hria a, zahthiam hnam hi antam lo khawp ang. Hetia Ṭhutphah kirleh hi engtia tihzel tur nge tih laite hi a pawimawh a sin. Ṭhutphah hi neih hlen veng veng emaw, lo ngaihthah ngawt chi a ni lo. Nupa chu man leh mual inhlan felin fanau te an han nei a, fanu 2/3 te neiin a fanu te zawng zawngin pasal an neih zawh vek hnuah, Khai le! Ka nupui man bâ ka tlâk thei ta tiin, a puzawnte hnenah Ṭhutphah hi a kirleh ṭhin tur a ni. Fanu nei lovin man an tlâk thei ngai lo.
Mizo Inneih man leh muala, Ṭhutphah pawimawh zia hi hre lo hian kan lo inkir kual satliah mai mai ang tih a hlauhawm a, zirchiangin a hlutna te hria in, hmangtangkai thar leh a ṭha ngawt mai. Nupui te man bâ ral ta mai2 kan tam awm a sin mawle
Post a Comment